08.02.2010 Sannleiksskýrslan er tilbúin Sannleiksskýrslan margumtala var tilbúin í janúar, eins og ég hef áður sagt ykkur. Hún var komin í umbrot. Þá var hún skyndilega dregin til baka. Tveir af þremur nefndarmönnum boðuðu töf um óvissan tíma og fjölluðu um gráthneigð sína. Við þurfum því að vita ýmislegt. Hver er munurinn á skýrslunni frá í janúar og þeirri skýrslu, sem kannski kemur einhvern tíma? Hvað olli töfum? Af hverju fór nefndin allt í einu að tala um andmælarétt? Hver kippti í hvaða spotta? Við þurfum að fá skýringar á laumuspili sannleiksnefndar, því að laumuspil er andstæða sannleikans. Sannleiksnefndin hefur okkur að fífli.

08.02.2010 Heiðin mikla og veglausa Tvær stærstu og grónustu heiðar landsins eru í Norður-Þingi, Melrakkaslétta og Búrfellsheiði. Ég hef riðið um þær báðar. Sú síðari er merkari fyrir þá sök, að henni hefur ekki verið spillt með jeppaslóðum. Hún er nánast alveg veglaus frá Fjallalækjarseli í Þistilfirði upp að Heljardalsfjöllum ofan við Víðirhól á Fjöllum. Flæmið mikla er algróið, þótt fjöll standi stök upp úr heiðinni á nokkrum stöðum. Heiðin er svo fáfarin, að þar hafa varla mótast hestagötur, við töltum mest eftir kindaslóðum. Fjarlægð menningarinnar og spillingarinnar er óendanleg. Kyrrð og kvak, lyng og lykt, jarm og jóreykur.

08.02.2010 Davíðska í Hollandi Hollenzkir stjórnendur seðlabanka og bankaeftirlits segjast hafa verið blekktir. Þeir leggja samt ekki fram nein gögn. Segja ekki, hvaða persónur blekktu þá og hvernig. Fara bara með slúður. Eru eins og Davíð Oddsson seðlabankastjóri. Hann hrósaði útrásinni opinberlega, en segist hafa varað við henni í einkasamtölum. Af hverju eru áhyggjur og viðvaranir þessara embættismanna ekki skjalfestar? Af hverju tala þeir óljóst um "þá", en nefna viðmælendur sína ekki á nafn? Það stafar af, að allt þetta er helber lygi. Embættismenn unnu ekki vinnuna sína og þyrla því upp ryki kringum það.

08.02.2010 Dómarar smíðuðu skrímslið Gott er að fá lög, sem hindra dómara í að dæma blaðamenn fyrir ummæli viðmælenda. Enn brýnna er að hindra dómara í að túlka fjármál sem einkalíf manna. Með því hindruðu dómarar eðlileg skrif um fjármál útrásarmanna. Brýnast af öllu er að skilgreina bankaleynd að nýju. Við búum við kerfi fjármála, banka, einkamála og leyndar, sem gerði fjármálageirann í heild að skrímsli. Blaðamenn gátu ekki lýst inn í kerfið, því að dómarar refsuðu þeim fyrir það. Kanna þarf dóma yfir blaðamönnum síðasta áratuginn til að finna, hvernig hægt sé að hindra hliðstætt framferði dómara í framtíðinni.

08.02.2010 Hatur dómara á blaðamönnum Katrín Jakobsdóttir sýnir frumvarp um fjölmiðla, sem ver blaðamenn gegn ýmsu hatri dómara. Lögin stöðva, að þeir dæmi blaðamenn fyrir ummæli viðmælenda. Núverandi lög gera þó ráð fyrir, að fyrst sé leitað að höfundi; síðan að blaðamanni, ef höfundur finnst ekki. Þá að ritstjóra, ef blaðamaður finnst ekki; að útgefanda, ef ritstjóri er flúinn til Ameríku; og loks að prentara, ef útgefandi er líka horfinn. Úr því að þau lög halda ekki, þarf að hnykkja á þeim. Dómarar hafa síðustu ár farið víðar út fyrir lög, til dæmis gert fjármál að einkamálum. Fyrir hrun lögðu þeir stein í götu skrifa um fjármál.

07.02.2010 Kristrún gleymdi IceSave I Kristrún Heimisdóttir fer skakkt með númer IceSave samninganna. Hún gleymir þeim, sem Ingibjörg Sólrún Gísladóttir og ríkisstjórn hennar gerðu. Það var IceSave númer I. Það, sem Kristrún kallar IceSave I og II eru í rauninni IceSave II og III. Við erum núna að fara í IceSave númer IV. Það hentar Kristrúnu að gleyma IceSave númer I, því að sá samningur gaf tóninn um það, sem síðan fylgdi. Kristrún er með þessu að beina athyglinni frá aðild sinnar lénsfrúar að upphafi IceSave hengingarólarinnar. Fólk, sem skrifar um þessi mál, hefur oft einhverra hagsmuna að gæta. Kristrún er engin undantekning.

07.02.2010 Birgir Ármannsson hreinn Þingflokkur sjálfstæðismanna sker sig úr í spillingu. Þar tróna gráðugir braskarar í flestum sætum. Fremstur fer sá, sem réðst að bótasjóði Sjóvá, er lenti síðan á skattgreiðendum. Þar eru kúlulánadrottningar og skattsvikarar, sem greiddu sér laun í formi lána. Þar eru hugmyndafræðingar græðginnar og dæmdir afbrotamenn. Sumir greiddu sér arð úr gjaldþrota fyrirtækjum. Aðrir fengu milljónir á milljónir ofan frá útrásarbönkum og afbrotaliði. Og þær, sem skila ríkisendurskoðun ekki upplýsingum um styrki. Flest þetta mátti greiðlega sjá í yfirliti DV á föstudaginn. Er bara Birgir Ármannsson hreinn?

07.02.2010 ExxonMobil og Hannes Hólmsteinn ExxonMobil er í herferð gegn því, að loftslagsbreytingar séu af mannavöldum. Frá því segir á forsíðu Independent í dag. Olíurisinn felur hægri sinnuðum ráðgjafarstofum að leita uppi sérvitra fræðimenn, sem eru tilbúnir að semja skýrslur af því tagi. Hér á landi er Hannes Hólmsteinn Gissurarson málsvari þessa sjónarmiðs. Það er í 1% minnihluta meðal fræðimanna í loftslagsmálum. Nær samt mikilli dreifingu, því að vasar olíurisans eru ótæmandi. Blásnar eru út villur í mati á bráðnun jökla í Himalaya og klaufalegt orðalag í tölvupósti. Allt er það til að gefa olírisanum svigrúm til að menga meira.

07.02.2010 Viðskiptum haldið gangandi Bezta verk ríkisstjórnar Geirs Haarde var að halda viðskiptum gangandi, er allir bankarnir hrundu á einni viku. Minnast skal þess, sem vel er gert. Við urðum lítið vör við hrunið á sjálfum okkur, plastkortin virkuðu og tekið var við verðlausum krónum. Í mjög skamman tíma lentu sumir í vandræðum erlendis. Flest annað, sem ríkisstjórnin gerði í hruninu var misráðið. Pumpaði stórfé frá skattgreiðendum í peningamarkaðssjóði auðmanna. Þess vegna hefur opinber þjónusta verið minnkuð og skattar hækkaðir. Ekki vegna IceSave. Einnig samdi stjórn Geirs um fyrsta IceSave samninginn, sem gerði síðari samninga erfiða.

07.02.2010 Afskriftir verði færðar til Bönkunum ber að gefa meira eftir af verðbólgu- og gengislækkunar-skuldum fólks. En það má ekki koma óbeint af peningum frá ríkinu. Skattgreiðendur hafa alls ekki efni á slíku. Nóg lögðu Davíð Oddsson og Geir Haarde á þá fyrir hálfu öðru ári. Bönkunum ber fremur að nota peningana, sem þeir vilja heldur gefa óráðsíumönnum útrásar. Bankarnir verða að stöðva afskriftir í þágu stórþjófa og flytja þær í afskriftir í þágu almennings. Bankarnir eru því miður blikkfastir í því hjólfari, að þeir starfi í þágu glæpamanna. Ég sé enga leið til bóta, aðra en lög frá Alþingi, sem banni slíka þjónkun.

06.02.2010 Fá endurgreitt í okri Lausn Arion-banka felst í að gefa Högum færi á að okra á almenningi. Hagar eru ekki bútaðir niður í einstök fyrirtæki til að búa til samkeppni. Finnur Sveinbjörnsson tekur meinta hagsmuni eigenda Haga fram yfir hag almennings. Það er gallinn við að sleppa bankastjórum lausum og gera þá að pólitíkusum. Nú er bankinn aftur einkavæddur og telur sig ekki hafa neinar skyldur við þjóðina. Bankinn vonast til að fá peningana sína til baka á þann hátt, að Hagar okri sem mest á almenningi. Þetta er gallinn við einkavæðinguna. Hún felur í raun í sér, að græðgisvæðing áratugarins heldur áfram á fullri ferð.

06.02.2010 Fundafælni og frí Jóhönnu Hefði kosið, að Jóhanna Sigurðardóttir talaði við blaðamenn úti í Bruxelles. Hún hefði náð þar hundrað manns í einu. Hefði sagt þar, að Ísland hafi samið um IceSave með hnífinn á barkanum. Þar séu ósanngjörn atriði. Vextir séu of háir. Ósanngjarnt sé að gera umframgreiðslum Hollands og Bretlands jafnhátt undir höfði og umsömdum lágmarksgreiðslum. Ófært sé að taka efnahagsaðstoð við Ísland í gíslingu Bretlands og Hollands. Þetta átti hún að segja öllum blaðamönnum hjá Evrópusambandinu, en gerði ekki. Það er brottrekstrarsök. Hins vegar finnst mér í lagi, að forsætis geti tekið vikufrí frá störfum.

06.02.2010 Þurrkaður þari á Þremur frökkum Fékk ferskan krækling og þurrkaðan þara í forrétt hjá Úlfari Eysteinssyni á Þremur frökkum. Síðan kom hrár hvalur sashimi, svo saltfiskur og loks brennt skyr brûlée. Úlfar Eysteinsson sýndi í gær, að hann er einn fremsti kokkur okkar. Er ekki í froðum og hlaupi, litum og skrauti, bara í mat. Fiskurinn er auðvitað aðdráttaraflið, saltfiskurinn eins og beztur verður, hnausþykkur og létt eldaður. Þurrkaði þarinn er tilraun Úlfars, fyrirtaks snakk-fæði. Ferskur kræklingur og hrár hvalur eru herramannsmatur. Brennt skyr er hinn fullkomni eftirréttur. Lambakjöts- og grænmetisréttir staðarins eru lakari.

06.02.2010 Hef borgað í þrjátíu ár Slapp við að borga á Þremur frökkum í gær, því að eiginkonan bauð. Að öðru leyti borga ég alltaf upp í topp á veitingahúsum. Hef ævinlega gert svo í þá áratugi, sem ég hef rýnt í mat og vín, veitingar og ferðir. Mér er sagt, að öðru hafi verið haldið fram á einum stað í blogginu í gær, en hef ekki fundið staðinn. Get samt fullyrt, að það er helber lygi. Tel, að frítt eða niðurgreitt fæði eyði marktækni slíkra greina. Nánast öll önnur matarrýni en mín er því marki brennd. Við Michelin gamli stöndum okkar pligt, enda hoknir af reynslu, skuldum engum neitt. Hef lofað og lastað matstaði í þrjátíu ár.

06.02.2010 Hversu margir samningar? Fyrst skrifaði Baldur Guðlaugsson undir samning við Holland um tæplega sjö prósent vexti á IceSave skuld. Fyrir hönd Geirs Haarde og Davíðs Oddssonar. Í annað sinn skrifaði Svavar Gestsson undir samning um tæplega sex prósent vexti. Fyrir hönd Steingríms J. Sigfússonar. Það var illskárri samningur, en samt vondur. Í þriðja sinn gerðu embættismenn nokkru skárri samning um ýmsa fyrirvara Alþingis. Svo miklu skárri, að mér fannst rétt að þola hann. Nú liggur fyrir dyrum að gera fjórða samninginn við Bretland og Holland. Hann verður ögn skárri en hinir fyrri. Hversu margir verða IceSave samningarnir? Og hversu dýrir?

06.02.2010 Skuldir stórþjófa og almennings Siðblindir bankastjórar aðstoða stórþjófa við kennitöluskipti og gera þeim kleift að taka við rekstrinum að nýju. Þá er búið að afskrifa helling af skuldunum og skilja þær eftir í gamla félaginu. Ef Ásmundur Stefánsson í Landsbankanum umgengist venjulegt fólk á sama hátt, mundi hann segja: Við skiptum um kennitölu fyrir þig, afskrifum íbúðina þína um helming, afhendum þér hana aftur. Þú skuldar bara tuttugu milljónir í stað fjörutíu. Ásmundur gerir það ekki, því að þú ert ekki stórþjófur. Vitnar bara í Gylfa ráðherra, er bullar, að skuldir almennings geti ekki horfið. Skuldir stórþjófa hverfa.

05.02.2010 Forsætis fer huldu höfði Þegar Jóhanna Sigurðardóttir hitti José Manuel Barroso, hafði hún færi á að tala við heimspressuna. Sem fylgir framkvæmdastjóra Evrópusambandsins við hvert fótmál. Jóhanna bannaði hins vegar aðkomu fjölmiðla, kallaði ekki á blaðamenn eftir fundinn. Hún vildi ekki nota tækifærið. Kannski treystir hún ekki útlenzku sinni. En hún gat bara talað íslenzku eins og Vilhjálmur ráðherra frá Brekku í Mjóafirði. Nógir eru túlkarnir. Kannski er hún bara mannafæla. Ákvörðun Jóhönnu er ekki bara röng, heldur sýnir vel, að hún er ófær um að vera forsætis. Raunar hefur Steingrímur tekið af henni ómakið.

05.02.2010 Þverstæð yfirlýsing bankastjórans Ótrúlegt er, hvað bankastjóri Arion getur bullað. Nánast í sömu setningunni segir Finnur Sveinbjörnsson, að Hagar fari á markað og að fyrri stjórnendur fái að eiga 15%. Ef Hagar fara á markað, getur engin fyrirskipað, hvað hver megi eiga stóran hlut. Það ræðst bara af kaupum og sölu hlutabréfa. Jóhannes í Bónus getur þess vegna eignast hundrað prósent. Finnur ætlar að gefa eftir 40 milljarða af skuldum Haga og er að reyna að fegra dæmið fyrir almenningi. Þess vegna talar hann um 15% hámark Jóhannesar og félaga, þótt það sé alveg marklaus fullyrðing. Finnur opnar aðeins munninn til að blekkja almenning.

Næsta síða
Greinar sem á eftir að sýna: 7413