Isola San Michele
Við höldum næst í norður frá Feneyjum. Bátaleið 52 fer frá Lido og Feneyjum til Murano, en að auki er hægt að komast frá Feneyjum með bátaleiðum 12, 13 og 23. Leiðir 23 og 52 koma við á Isola San Michele.
Kirkjugarðseyja Feneyja, næstum öll lögð undir leiði, sem mörg eru fagurlega blómum skreytt. Bátastöðin er við eyjarkirkjuna frá 1469, klædda að framan í hvítan Istríu-stein.
Kirkjugarðinum er skipt í hluta eftir kirkjudeildum.
Margir frægir útlendingar eru grafnir á eyjunni, þar á meðal Igor Stravinsky og Ezra Pound.
