Veitingabransinn er samkeppnismarkaður. Enn hefur bætzt við staður, er býður rétt dagsins á 1200 krónur og 1400 krónur að súpu innifalinni. Eldhrímnir í glerhúsinu í Borgartúni 14 hefur persneskt ívaf í mat. Í hádeginu í dag voru persneskar hakkbollur, eins konar kebab. Með ostbökuðum kartöflusneiðum, steiktum gulrótum, salati og jógúrtsósu. Fagurlega uppsettur og girnilegur réttur, en of dauft kryddaður. Súpa dagsins var matarmikil grænmetissúpa og kostar 700 krónur, sé hún pöntuð ein. Hátt er til lofts og húsrýmið nakið. Bílastæði eru fá á þessum slóðum, þótt þetta sé við hlið glerturnsins auða.
