Frá 1998 til síðasta árs bannaði Evrópusambandið til bráðabirgða innflutning erfðabreyttra matvæla og útsæðis, meðan það væri að smíða regluverk um málið. Það hefur nú fæðst og felur í sér harðar reglur um upprunavottorð og merkingar á umbúðum, sem Bandaríkin sætta sig ekki við. Þau hafa kært sambandið fyrir Alþjóða viðskiptastofnuninni, sem tók málið fyrir í fyrradag. Niðurstöðu hennar er að vænta eftir um það bil mánuð. Þá má búast við, að aukinn hvellur færist í illvígar deilur um erfðabreytt matvæli og útsæði, enda eru 70% Evrópubúa andvígir erfðabreyttum afurðum.
