TRYGGVI ÞÓR HERBERTSSON er stundum kallaður Hagfræðistofnun Háskóla Íslands, þegar mikið liggur við og kalla þarf á virðulega hægri sinnaðar túlkanir á vandamálum í þjóðfélaginu. Jón Kristjánsson ráðherra hefur nú borgað honum fyrir að komast að raun um, hvernig sveitarómagar svína á þjóðfélaginu.
JÓN KRISTJÁNSSON fær hann næst til að sýna, að veikt fólk sé til vandræða, sé hlutfallslega fleira en í útlöndum, þrátt fyrir framfarir í heilbrigðismálum, fylli spítala og eigi í staðinn að fara út á vinnumarkaðinn, svo að hægt sé að loka sjúkradeildum.
Að þessu sinni hefur hann látið Tryggva finna út, að það séu öryrkjar, sem séu til vandræða í þjóðfélaginu. Þeir séu svindlarar, sem liggi uppi á ríkissjóði og skattborgurum.
ÖRYRKJAR ERU HUGMYNDARÍKIR, að mati Tryggva og Jóns. Einkum eru hættulegar einstæðar, ungar mæður á höfuðborgarsvæðinu, sem koma sér á örorkubætur í stað þess að hunzkast út að vinna.
Þetta gera þær í skjóli þess, að örorka er reiknuð út með læknisfræðilegum aðferðum í samræmi við sérstakan örorkumatsstaðal. Hugsið ykkur þetta, læknisfræðilegt mat í samræmi við staðal!
AUÐVITAÐ ER ÞETTA ÓSVINNA. Tryggvi og Jón eru sammála um að endurskoða þurfi kerfið, sem metur örorkuna. Kasta þarf út læknunum og stöðlunum, sem láta aumingjana plata sig, og taka í staðinn upp annars konar mat, til dæmis pólitískt mat, þar sem aðild að Framsókn yrði metin sem 50% örorka á heilanum og ráðherradómur sem 500% örorka á heilanum.
VIÐ ÞEKKJUM ÞESSAR SKOÐANIR. Við höfum oft heyrt hatrið á velferðinni, fullyrðingar um, að alls konar sveitarómagar liggi uppi á kerfinu, þykist vera veikir eða skakkir, neiti að fara út að vinna og leggist bara í kör.
FRAMSÓKN ÞEKKIR SVEITARÓMAGA og hefur alltaf grunað, að velferðin sé svindl, fundin upp af krötum og kommum á mölinni.
Þá er mikilvægt fyrir hugsjónamanninn Jón Kristjánsson heilbrigðisráðherra að hafa aðgang að vísindamanninum Tryggva Þór Herbertssyni, öðru nafni Hagfræðistofnun Háskóla Íslands. Ekki er síður mikilvægt að hafa Öryrkjabandalag, sem segir ja og humm, þegar Jón og Tryggvi brillera.
DV
