Padova
Gamall háskólabær með fjörlegri borgarmiðju, einkum að morgni dags á markaðstorginu Piazza delle Erbe við Palazzo della Ragione. Í nágrenni þess eru ýmsar sögufrægar byggingar, svo sem Battistero við dómkirkjuna og hallirnar Corte Capitano og Loggia della Gran Guardia. Önnur torg á þessu svæði eru Piazza dei Frutti og Piazza dei Signori.
Caffé Pedrocchi er einnig í þessari gömlu borgarmiðju, miðstöð menningarvita. Stúdentar setja mikinn svip á miðbæinn, enda er háskólinn sá annar elzti á Ítalíu, stofnaður 1222. Í miðbænum er fullt af kaffihúsum, veitingastofum og sérverzlunum með mat.
Við leggjum bílnum á bílageymslusvæði við Via Gaspare Gozzi rétt við norðausturhorn umferðarhringsins um miðborgina. Stæðið er í króknum milli Via Trieste og skurðarins Giotto Popolo og verður tæpast nær miðbænum komizt með góðu móti. Þaðan göngum við á brú yfir skurðinn inn í miðbæinn og verður þá strax fyrir okkur lystigarður borgarinnar á vinstri hönd.
Giardini dell’Arena
(Corso Garibaldi. )
Leifum gamla borgarmúrsins hefur á þessum hluta verið breytt í lystigarð, sem nær frá borgarskurðinum upp að Cappella degli Scrovegni og Museo Civico Eremitani. Þar er til sýnis nýtízkulegur skúlptúr.
Þegar við vorum þar síðast, var La Foresta di Birnam (sbr. Macbeth eftir Shakespeare) eftir Pino Castagna beint fyrir framan Cappella degli Scrovegni.
Til þess að komast inn í kapelluna þurfum við að fara inn um innganginn að safninu, sem er í suðvesturhorni garðsins.
Cappella degli Scrovegni
(Piazza Eremitani. Opið 9-18. )
Reist 1303 í rómönskum stíl til sáluhjálpar okrara að nafni Scrovegni, einn geimur að innanverðu, allur þakinn steinmálverkum eftir Giotto, máluðum 1303-1305. Bezt er að skoða kapelluna að morgni dags, þegar farþegarúturnar eru enn ekki komnar.
Giotto var fyrsti afburða listmálari Ítalíu, merkisberi hins líflega gotneska stíls, þegar hann tók við af hinum stirða býzanska stíl í upphafi fjórtándu aldar. Hann var fátækur bóndasonur, en varð snemma mikilvirkur í starfi og miðpunktur í hópi ítalskra menningarvita þess tíma. Málverkin í þessari kapellu eru það, sem bezt hefur varðveitzt af verkum hans.
Málverkin í kapellunni eru á fjórum hæðum. Í neðstu röð eru myndir, sem sýna dyggðir og lesti. Síðan koma tvær raðir með myndum af lífi og dauða Krists. Efst er röð mynda úr lífi Maríu meyjar. Innan á kapellustafni er risamynd af dómsdegi og er hún nær býzanska stílnum en hinar.
Við skoðum næst söfnin við kapelluna.
Museo Civico Eremitani
(Piazza Eremitani. Opið mánudaga-laugardaga 8:15-12 & 15:30-18:30 (-17:30 að vetri), sunnudaga 9-12 & 15:30-17:30 (-17 á veturna). )
Í klaustrinu við hlið kapellunnar eru nokkur söfn, svo sem fornminjasafn, myntsafn og listasögusafn. Klausturhúsin eru frá 1276-1306.
Merkasti hluti fornminjasafnsins er grafhýsi Volumni-ættar frá 1. öld. Þar eru líka steinfellumyndir frá rómverskum tíma. Í myntsafninu er nánast heilt safn feneyskrar myntar. Listasögusafnið er í mótun og á að sýna þróun myndlistar Feneyjasvæðisins. Verk eftir Giotto skipa þar virðingarsess.
Við förum vestur yfir Piazza Eremitani, förum norður fyrir hornið á húsaröðinni og göngum síðan 600 metra til suðurs eftir Via Cavour, þar sem við komum að Caffè Pedrocchi hægra megin götunnar.
Caffè Pedrocchi
(Via 8. Febbraio 2. Lokað mánudaga. )
Risastórt kaffihús frá 1831 í nýgnæfum stíl, einn helzti hornsteinn menningar- og stjórnmálalífs Ítalíu á sameiningarárum landsins, þegar það brauzt undan veldi austurríska keisaradæmisins. Þar héldu til ýmsar helztu frelsishetjur landsins. Þetta er núna í senn veitingahús og kaffihús, spila- og setustofa, þungamiðja alls þess, sem gerist í Padova.
Frá suðurdyrum kaffihússins förum við til hægri 50 metra eftir Via Cesare inn á Piazza dei Frutti við hlið borgarhallarinnar. Við göngum fyrir austurenda hennar inn á Piazza delle Erbe og virðum hana fyrir okkur.
Palazzo della Ragione
(Piazza dei Frutti. )
Reist 1218 sem dómhöll og ráðhús borgarinnar.
Hún hefur að geyma stærsta miðaldasal Evrópu, 80 metra langan, 27 metra breiðan og 27 metra háan. Veggir salarins eru skreyttir 333 freskum eftir Nicola Miretto, frá 1420-1425. Þær komu stað fyrri steinmálverka eftir Giotto, sem eyðilögðust í bruna 1420.
Við göngum vestur úr torginu tæplega 100 metra leið eftir Via Manin og beygjum til vinstri inn á Piazza del Duomo, þar sem dómkirkjan blasir við. Hægra megin torgsins er miðaldahöll.
Palazzo del Monte di Pietà
(Piazza del Duomo. )
Höllin sjálf er frá miðöldum, en bogagöngin framan við hana eru frá 16. öld.
Milli hallar og dómkirkju er skírnhús.
Battistero
(Piazza del Duomo. )
Rómanskt skírnhús stílhreint frá 4. öld, leifar kirkju, sem hér stóð, áður en 16. aldar dómkirkjan var reist. Inni í því eru fjörlegar freskur eftir Giusto de’Menabuoi frá síðari hluta 14. aldar.
Michelangelo hóf hönnun dómkirkjunnar, sem breyttist töluvert í höndum eftirmannanna.
Við förum frá torginu 50 metra leið norður eftir Via Monte di Pietà að Piazza dei Signori. Gamla herlögreglustöðin er við vesturenda torgsins.
Palazzo del Capitaniato
(Piazza dei Signori. )
Reist 1599-1605 fyrir herlögreglu borgarinnar. Í turninum er stjörnuúr frá 1344.
Við torgið eru fögur boga- og súlnagöng með sérverzlunum og kaffistofum.
Við vesturenda suðurhliðar torgsins er hásúlnahöll.
Loggia della Gran Guardia
(Piazza dei Signori. )
Höll höfðingjaráðsins, reist 1523 í endurreisnarstíl með háu og grönnu súlnaporti, núna notuð sem ráðstefnumiðstöð.
Við höfum lokið skoðun, förum austur úr Piazza dei Signori eftir Via San Clemente og síðan Piazza dei Frutti og Via Oberdan, samtals um 300 metra leið. Á horninu við Caffè Pedrocchi beygjum við til vinstri í Via Cavour og förum norður hana 600 metra að lystigarðinum, sem við göngum langsum til að komast yfir brúna að bílastæðinu. Næst könnum við gististaði í miðborginni.
Hótel
(Padova. )
Miðborgargistingu má fá 50 metrum sunnan við Piazza delle Erbe, í 29 herbergja Majestic Toscanelli, Via dell’Arco 2, sími 663 244, fax 876 0025, verð L. 190000 með morgunverði.
Eða við hlið Caffè Pedrocchi, í 22 herbergja Leon Bianco, Piazzetta Pedrocchi 12, sími 875 0814, fax 875 6184, verð L. 157000.
Næst beinum við sjónum okkar að völdum veitingahúsum miðborgarinnar, sem heimamenn nota sjálfir.
Veitingahús
(Padova. )
Miðborgarveitingar má fá 100 metrum norðan við Piazza dei Signori, í Belle Parti-Toulá, Via Belle Parti 11, sími 875 1822, verð fyrir tvo L. 160000, lokað sunnudaga og í hádegi mánudaga.
Einnig 50 metrum norðan þess, í Isola di Caprera, Via Marsilio da Padova 11/15, sími 876 0244, verð fyrir tvo L. 120000, lokað sunnudaga.
Eða við vesturenda borgarhallarinnar, í Cavalca, Via Manin 8, sími 876 0061, verð fyrir tvo L. 90000, lokað þriðjudagskvöld og miðvikudaga.
Við höldum svo úr bænum áleiðis til Vicenza, um 40 km leið.
Vicenza
Frægust er borgin fyrir arkitektinn Andrea Palladio, sem var uppi 1508-1580. Hann fæddist í borginni og hannaði ýmsar frægustu byggingar miðbæjarins, svo sem Basilica Palladiana, Loggia del Capitaniato, Palazzo Valmarana, Teatro Olimpico og Palazzo Chiericati. Margir telja miðbæ Vicenza einn fegursta miðbæ Ítalíu, enda er hann að mestu leyti frá endurreisnartímanum.
Palladio nam rómverska byggingarlist keisaratímans í Róm. Síðan hannaði hann mörg sveitasetur feneyskra aðalsmanna í nágrenni borgarinnar og nokkrar hallir í Feneyjum sjálfum, kirkjuna Redentore á Giudecca-eyju, svo og klaustrið og kirkjuna á San Giorgio eyju. Flest eru verk hans þó í heimaborginni.
Hér skoðum við ekki aðeins verk Palladio, heldur einnig mannlífið á torgunum umhverfis Basilica Palladiana.
Við komum frá Padova úr austri, förum inn á umferðarhring borgarinnar og inn úr honum eftir Contrà porta Padova, yfir brú og beygjum strax til vinstri inn á torgið fyrir framan Palazzo Chiericati, þar sem eru bílastæði.
Palazzo Chiericati
(Piazza Matteotti. Opið þriðjudaga-sunnudaga. )
Reist 1550 af Andrea Palladio.
Höllin er núna borgarminjasafn, Museo Civico. Þekktasta listaverkið er sólarvagn Giulio Carpione. Þar eru einnig nokkrar gotneskar altaristöflur.
Við göngum af torginu yfir Corso Andrea Palladio og í Teatro Olimpico.
Teatro Olimpico
(Corso Andrea Palladio. Opið á sumrin 9:30-12:20 & 15-17:30, á veturna 14-16:30. )
Elzta leikhús Evrópu undir þaki, reist 1579-1585, hannað af Palladio og lærisveini hans, Vincenzo Scamozzi.
Áhorfendasalurinn myndar hálfan hring í líkingu við útileikhús Grikkja og Rómverja, en trébekkir koma í stað steinbekkja og eins konar himinn er málaður í loftið. Sviðsmyndin er föst, með Þebustrætum máluðum í þrívídd.
Ödipus konungur eftir Sófókles var fyrsta verkið, sem sýnt var í leikhúsinu. Grísk leikskáld fornaldar skipa fastan sess í sýningarskrá leikhússins.
Frá leikhúsinu förum við upp Corso Andrea Palladio um 200 metra og beygjum til vinstri í Contrà Santa Barbara, þar sem við komum eftir 100 metra að Piazza dei Signori. Þar blasir við borgarturninn mikli.
Torre di Piazza
(Piazza dei Signori. )
Óvenjulega grannur múrsteinsturn, reistur á 12. öld og hækkaður á 14. og 15. öld, svo að hann er nú 82 metra hár.
Hann gnæfir yfir Piazza dei Signori, sem er umkringt 15. aldar höllum, þar á meðal Basilica Palladiana. Torgið er líflegt markaðs- og kaffihúsatorg.
Við beinum athygli okkar að basilíkunni.
Basilica Palladiana
(Piazza dei Signori. )
Rétt nafn borgarhallarinnar með sívala koparþakið er Palazzo della Ragione, en oftast er hún kennd við höfund súlnaganga hennar, arkitektinn Palladio. Sjálf höllin er frá 15. öld og var farin að gefa sig, þegar hann var fenginn til að styrkja hana með tveggja hæða súlnagöngum árið 1549. Ofan á súlnagöngunum eru marmarastyttur grískra og rómverskra guða.
Myndastytta af Palladio er undir suðvesturgafli hallarinnar.
Norðan torgsins er lögreglustöðin gamla.
Loggia del Capitaniato
(Piazza dei Signori. )
Palladio reisti höllina 1571. Fyrst var hún lögreglustöð borgarinnar, en nú er borgarráðssalurinn þar til húsa.
Vinstra megin við höllina er þekktasta veitingahús borgarinnar, Gran Caffè Garibaldi á 2. hæð, sími 544 147, verð fyrir tvo L. 110000.
Hægra megin við hana er gatan Contrà del Monte. Framhald hennar handan Corso Andrea Palladio er Contrà Porti. Við þá götu eru nokkrar gotneskar hallir í feneyskum stíl og nokkrar hallir eftir Palladio í palladískum endurreisnarstíl.
Ef við höfum tíma, getum við gengið frá suðvesturenda basilíkunnar um Calle Muscheria og Contrà Garibaldi tæplega 200 metra leið að dómkirkjunni.
Duomo
(Piazza Duomo. )
Kirkjukórinn, sem snýr að torginu, er upprunalegur, sem og útveggir kirkjunnar. Að öðru leyti skemmdist dómkirkjan mikið í síðari heimsstyrjöldinni.
Frá dómkirkjutorginu göngum við norðvestur Via Battisti rúmlega 100 metra leið og beygjum til hægri í Corso Andrea Palladio. Á norðurhorni gatnamótanna er Palazzo Valmarana, ein af höllum Palladio, frá 1566. Síðan förum við Corso Andrea Palladio til norðausturs 600 metra leið til Piazza Matteotti, þar sem er bílastæðið okkar. Næst beinum við athyglinni að gististöðum í miðborginni.
Hótel
(Vicenza. )
Miðborgargistingu má fá 300 metrum suðvestan dómkirkjunnar, í 35 herbergja Campo Marzio, Viale Roma 21, sími 545 700, fax 320 495, verð L. 250000 með morgunverði.
Eða 300 metrum vestan við suðvesturenda Corso Andrea Palladio í 33 herbergja Cristina, Corso Santi Felice e Fortunato 32, sími 323 751, fax 543 656, verð L. 165000 með morgunverði.
Næst beinum við sjónum okkar að völdum veitingahúsum miðborgarinnar, sem heimamenn nota sjálfir.
Veitingahús
(Vicenza. )
Miðborgarveitingar má fá 100 metrum sunnan austurenda Piazza dei Signori, í Scudo di Francia, Contrà Piancoli 4, sími 323 322, verð fyrir tvo L. 130000, lokað sunnudagskvöld og mánudaga.
Einnig 200 metrum vestan dómkirkjunnar, í Agli Schioppi, Contrà del Castello 26, sími 543 701, verð fyrir tvo L. 110000, lokað laugardagskvöld og sunnudaga.
Eða 50 metrum norðan Piazza dei Signori, í Tre Visi, Contrà Porti 6, sími 324 868, verð fyrir tvo L. 150000, lokað sunnudagskvöld og mánudaga.
Við höldum svo úr bænum áleiðis til Verona, um 40 km leið.
Garibaldi
(Piazza dei Signori. Lokað miðvikudaga. Verð: L.110000 (4653 kr) fyrir tvo. Öll helztu greiðslukort. B2)
Gamalfínt veitingahús á annarri hæð fyrir ofan pizzustofu við hlið Loggia del Capitaniato við Piazza dei Signori.
Frekar fínlegur, en víðáttumikill staður með flísagólfi og tágasetum á tréstólum. Þjónusta er kurteis.
• Olive farcite all’ascolani = djúpsteiktar olífur á salatbeði. • Petto d’oca affumicato con crostini = reykt gæsabrjóst. • Filetto di manzo con tartufi = ungnauta-hryggsteik með soðnu grænmeti.
Verona
Frægust er borgin sem sögusvið leikrits Shakespeare um Rómeó og Júlíu, elskendur frá 1302. Enn eru mörg hús gamla miðbæjarins frá þeim tíma og sum raunar eldri, þar á meðal hið fræga, tuttugu alda gamla hringleikahús. Borgin var 1263-1387 ein af endurreisnarborgum Ítalíu, undir stjórn Scaligeri hertoganna og undir stjórn feneyska heimsveldisins 1405-1814.
Ferðamenn koma til Verona til að komast í stemmningu á söngleik undir berum himni og til að kynnast borg, sem blandar saman endurreisnarstíl meginlands Ítalíu og hinum austræna stíl frá Miklagarði, sem einkennir nágrannaborgina Feneyjar. Gott er að skoða miðbæinn, því að hann er samanrekinn á eins ferkílómetra svæði, sem er vafið fljótinu Adige á þrjá vegu.
Í borginni eru fræg torg, Piazza Brà, Piazza delle Erbe og Piazza dei Signori; frægar hallir, Palazzo del Comune, Palazzo di Cangrande; og frægar kirkjur, Santa Anastasia og Duomo; svo og Péturskastali og gamli borgarkastalinn. Þar eru einnig háloftagrafhýsi Scaligeri-hertoganna og rómverskt útileikhús, auk hringleikahússins fræga.
Við byrjum borgarskoðun á torginu framan við hringleikahúsið.
Piazza Brà
Stærsta torg miðborgarinnar, útisamkomustaður borgarinnar og forgrunnur hins mikilfenglega hringleikahúss frá fornöld. Það er varðað nýgnæfum byggingum frá 19. öld og fornminjasafninu Museo Lapidario Maffeiano, á nr. 28.
Hringleikahúsið gnæfir austan við torgið.
Arena
(Piazza Brà. Lokað mánudaga. )
Byggingu þriðja stærsta hringleikahúss veraldar lauk árið 30. Það er 139 metra langt og 110 metra breitt og rúmar 25.000 áhorfendur í 44 sætaröðum. Það hefur varðveitzt nokkurn veginn í heilu lagi, að öðru leyti en því, að yzta byrðið er að mestu horfið.
Efst uppi er á góðum degi fagurt útsýni yfir borgina og til fjalla. Á sumrin eru haldnar þar miklar tónlistarhátíðir.
Frá hringleikahúsinu norðanverðu förum við inn í Via Mazzini.
Via Mazzini
Göngugata og eins konar miðbæjarás, sem tengir helztu torg miðborgarinnar, Piazza Brà og Piazza delle Erbe. Helztu tízkuverzlanir borgarinnar eru við þessa 500 metra löngu götu, sem liggur um gamalt hverfi þröngra göngugatna.
Úr norðausturenda götunnar komum við í suðurenda gamla miðbæjartorgsins.
Piazza delle Erbe
Fagrar byggingar frá endurreisnartíma einkenna þetta langa og mjóa torg, sem hóf göngu sína sem Rómverjatorg, Forum, og hefur verið lifandi borgartorg í tuttugu aldir. Það er nú markaðstorg, þakið sólhlífum torgsala, umkringt listsýningarsölum, tízkuverzlunum og gangstéttarkaffihúsum, af sumum talið eitt fegursta borgartorg Ítalíu.
Á torginu miðju er gosbrunnur með rómverskri höggmynd, sem táknar verzlun, venjulega kölluð Madonna di Verona. Í norðurenda þess er súla frá 1528 með ljóni heilags Markúsar, tákni Feneyjaveldis.
Við norðurendann er Palazzo Maffei, hlaðstílshöll frá 1668, með tízkuverzlunum og lúxusíbúðum.
Við austanverðan syðri hluta torgsins er kastali.
Palazzo del Comune
(Piazza delle Erbe. )
Ráðhúsið í borginni er gluggalítill miðaldakastali, sem ber strangan svip við torgið.
Sömu megin götunnar gnæfir hár turn yfir torgið.
Torre Lamberti
(Piazza delle Erbe. )
Háreistur turn frá 1172, 84 metra hár, með miklu útsýni. Inngangur í turninn er úr porti, sem við skoðum í þessari gönguferð.
Sömu megin torgsins, aðeins norðar er skrautleg höll.
Casa dei Mazzanti
(Piazza delle Erbe. )
Höll frá 1301, að utanverðu skreytt veggmálverkum, sem hafa verið gerð upp.
Við förum um sund norðan Torre dei Lamberti undir steinbogann Arco della Costa inn á annað myndarlegt torg.
Piazza dei Signori
Ferhyrnt torg með feneyskum svip. Á miðju torginu er stytta af rithöfundinum Dante Aligheri, sem bjó í borginni í skjóli Scaligeri-hertoganna, meðan hann var í útlegð frá Flórenz 1301-1304. Hann tileinkaði Scaligeri-hertoganum Cangrande I lokakafla meginverks síns, La Divina Commedia.
Norðan torgsins er höllin Loggia del Consiglio, austan þess er höllin Palazzo di Cangrande, og í suðurhorninu er höllin Palazzo di Ragione, sem er raunar bakhlið hallarinnar Palazzo del Comune.
Í suðausturhorninu hefur verið grafið niður á leifar hellulagðrar brautar, sem var rómverski þjóðvegurinn inn í borgina.
Við lítum fyrst inn í hallarport Palazzo di Ragione.
Scala della Ragione
(Piazza dei Signori. )
Portið var á miðöldum helzti markaður borgarinnar. Af torginu og upp að þáverandi dómsölum borgarinnar liggja voldugar tröppur í síðgotneskum Feneyjastíl, reistar 1446-1450. Sjálf höllin er frá 14. öld.
Við förum aftur úr portinu og skoðum höllina við norðurenda torgsins.
Loggia del Consiglio
(Piazza dei Signori. )
Fögur tengihöll frá 1493 í feneyskum endurreisnarstíl með háum og grönnum súlnasvölum við torgið og veggfreskum yfir svölunum. Á þakskeggi eru styttur af rómverskum frægðarmönnum, sem voru fæddir í Verona, svo sem Catullusi skáldi, Pliniusi náttúruvísindamanni og Vitruviusi byggingameistara.
Hornrétt á tengihöllina er önnur höll.
Palazzo di Cangrande
(Piazza dei Signori. )
Höllin er kennd við Cangrande I, þekktasta hertoga Scaligeri-ættarinnar, sem stjórnaði borginni 1263-1387. Hún er núna lögreglustöð.
Við förum með suðurhlið hallarinnar nokkra metra að litlu torgi með miklum minnisvörðum.
Arche Scaligere
(Santa Maria in Chiavica. )
Hér eru steinkistur Scaligeri-hertoganna hátt á stalli undir berum himni í tilkomumiklum 14. aldar turnum í gotneskum stíl með oddhvössum spírum framan við framhlið Palazzo di Cangrande. Þess háttar greftrun er einsdæmi í miðaldasögu Ítalíu.
Scaligeri-hertogarnir höfðu svo mikið sjálfsálit, að þeir vildu hvíla nær guði en aðrir höfðingjar, sem yfirleitt hvíla í kirkjuhvelfingum.
Að baki kistuturnanna er lítil, rómönsk kirkja frá 7. öld, Santa Maria Antica. Hún var ættarkirkja Scaligeri-hertoganna. Kistuturn Cangrande I er beint fyrir framan kirkjudyrnar.
Við förum norður með austurhlið Palazzo di Cangrande 100 metra eftir götunni Cavaletto og beygjum til hægri í Corso Sant’Anastasia, sem liggur að einni höfuðkirkju borgarinnar, aðra 100 metra til viðbótar.
Sant’Anastasia
(Piazza Sant’Anastasia. )
Voldug og háreist klausturkirkja Dóminíkusarmunka í rómönskum stíl frá 1290, með gotneskum inngangi, skreyttum veggfreskum frá 15. öld.
Frá bakhlið kirkjunnar förum við norður og niður brekkuna að ánni Adige, yfir hana á rómversku brúnni Ponte della Pietra og suður með bakkanum hinum megin að rómverska leikhúsinu, alls um 400 metra leið.
Teatro Romano
(Rigaste Redentore. Lokað mánudaga. )
Rómverskt leikhús frá 1. öld fyrir Krist, tíma Ágústusar keisara, og er enn notað til leiksýninga. Áður voru þar sýnd leikverk eftir Plautus, en nú er þar haldin árleg Shakespeare-hátíð. Leikhúsið er byggt inn í árbakkann og veitir gott útsýni frá heillegum áhorfendapöllum yfir ána til miðborgarinnar.
Frá leikhúsinu er farið í lyftu upp í klaustrið fyrir ofan.
Castel San Pietro
(Rigaste Redentore. Lokað mánudaga. )
Klaustrinu ofan við rómverska leikhúsið hefur verið breytt í fornminjasafn með frábæru útsýni yfir borgina og héraðið. Í safninu eru meðal annars fornar steinfellumyndir.
Við förum til baka yfir rómversku brúna og upp brekkuna handan hennar að dómkirkjunni. Við afturenda kirkjunnar förum við hjá anddyri biskupsgarðsins.
Palazzo di Vescovo
Gotneskur inngangur hallar dómkirkjubiskupsins.
Við förum fram fyrir kirkjuna og inn á torgið fyrir framan hana.
Duomo
Dómkirkjan hefur verið gerð upp og geislar hinum mildu steinlitum, sem hún bar upprunalega. Elzti hluti hennar er frá 12. öld og framhliðin er í rómönskum langbarðastíl, hönnuð af Nicolò.
Bleikar súlur halda uppi kirkjuþakinu. Helzta meistaraverk kirkjunnar er Upprisan eftir Tiziano, frá 1535-1540, í fyrstu kapellunni vinstra megin.
Frá kirkjunni er innangengt í skírnhúsið, sem raunverulega er 8. aldar múrsteinskirkja, San Giovanni in Fonte, með 12. aldar framhlið úr marmara.
Við förum frá kirkjunni til baka eftir Via Duomo, beygjum til hægri og förum 1200 metra eftir Corso Cavour að gamla borgarkastalanum.
Castelvecchio
(Corte Castelvecchio. Lokað mánudaga. )
Fagurlega hannaður kastali Scaligeri-hertoganna, reistur 1355-1375, á valdatíma Cangrande II, enn í góðu ástandi og hýsir nú glæsilega skipulagt listasögusafn, sem auðvelt er að skoða í réttri tímaröð. Það spannar síðrómverska list, frumkristna list, miðaldalist og list endurreisnartímans, þar á meðal verk Giovanni Bellini, Tiziano og Veronese.
Handan vopnadeildar safnsins er göngubrú, sem veitir gott útsýni til brúarinnar Ponte Scaligero.
Ponte Scaligero
Miðaldabrú, reist 1354-1376, á valdaskeiði Cangrande II, helzti vettvangur gönguferða borgarbúa nú á tímum. Brúin skemmdist í heimsstyrjöldinni síðari, en hefur verið gerð upp að nýju.
Frá Castelvecchio er bein, 600 metra leið eftir Via Roma til Piazza Brà, þar sem við hófum þessa gönguferð um Verona. Næst beinum við athygli okkar að gististöðum í miðborginni.
Hótel
(Verona. )
Í húsasundi út frá Corso Porta Nuova, alls um 200 metra frá megintorginu Piazza Brà, er 41 herbergja lúxushótelið San Luca, Vicolo Volto San Luca 8, sími 591 333, fax 800 2143, verð L. 260000 með morgunverði. Í þvergötu, nokkrum skrefum frá miðbæjarásnum Via Mazzini, er 93 herbergja Accademia, Via Scala 12, sími og fax 596 222, verð L. 300000 án morgunverðar.
Í þvergötu, nokkrum skrefum frá Corso Cavour, er 38 herbergja Victoria, Via Adua 6, sími 590 566, fax 590 155, verð L. 240000 án morgunverðar. Nokkrum skrefum austan við hringleikahúsið er 30 herbergja Giulietta e Romeo, Vicolo Tre Marchetti 3, sími 800 3554, fax 801 0862, verð L. 170000 með morgunverði.
Nokkurn veginn á sama stað er 49 herbergja Milano, Vicolo Tre Marchetti 11, sími 596 011, fax 801 1299, verð L. 150000 án morgunverðar. Um 200 metrum austan við borgarkastalann er 17 herbergja Cavour, Vicolo Chiodo 4, sími 590 166, verð L. 100000 án morgunverðar, en þar er ekki tekið við plastkortum.
Næst beinum við sjónum okkar að völdum veitingahúsum miðborgarinnar, sem heimamenn nota sjálfir.
Veitingahús
(Verona. )
Bezta veitingahúsið, um 300 metra beint suður af Piazza dei Signori, er Il Desco, Via Dietro San Sebastiano 7, sími 595 358, fax 590 236, verð L. 230000 fyrir tvo, lokað sunnudaga. Næst kemur afar gamalt og fagurt Dodici Apostoli, í húsasundi í elzta hluta borgarinnar, rúmlega 200 metrum vestur frá Piazza delle Erbe, við Corticella San Marco 3, sími 596 999, fax 591 530, verð L. 220000 fyrir tvo, lokað sunnudagskvöld og mánudaga.
Bezta fiskréttahúsið, nokkrum skrefum frá Arche Scaligeri, er Arche, Via Arche Scaligeri 6, sími 800 7415, verð L. 200000 fyrir tvo, lokað sunnudaga og í hádegi mánudaga. Bezti hótelsalurinn, nokkrum skrefum frá Via Mazzini, er Accademia, Via Scala 10, sími og fax 800 6072, lokað sunnudagskvöld og miðvikudaga. Nokkrum skrefum norður frá Piazza Brà er Torcolo, Via Cattaneo 11, sími 803 0018, fax 801 1083, verð L. 130000 for two, lokað mánudaga.
Aðeins 200 metrum framan við Anastasíu-kirkju er Trattoria Sant’Anastasia, Corso Sant’Anastasia 27, sími 800 9177, verð L. 110000 fyrir tvo, lokað sunnudaga og miðvikudaga. Nokkrum skrefum austan við hringleikahúsið er Tre Marchetti, Vicolo Tre Marchetti 19/b, sími 803 0463, verð L. 120000 fyrir tvo, lokað sunnudaga.
Þar með lýkur ferð okkar til Verona og dvöl okkar á Feneyjasvæðinu. Ef við ætlum til Feneyja, er gott að vita, að þangað eru 114 km á hraðbrautinni.
1996
© Jónas Kristjánsson
