Helmingur morgunverðargesta voru viðgerðamenn tækjasala áleiðis í útköll. Þeir voru í strigaskóm og gallabuxum. Helmingur afgangsins voru sölumenn sömu fyrirtækja. Þeir voru í blankskóm, ljósbláum skyrtum og bleiserjökkum. Fimmtándi hver var kona. Dæmigerður morgunverður á hótelinu við Stansted-flugstöðina. Þetta er eins og fyrir mörgum áratugum, þegar ég tók þátt í að kaupa prenttækni. Ég kannaðist við týpurnar og hef meiri samúð með viðgerðarmönnunum. Flugvallarhótel er skrítinn samkomustaður fólks, sem á ekkert sameiginlegt, er að koma og fara. Enginn gistir meira en eina nótt.
