Væri ég ferðamaður, vildi ég búa sem næst borgarmiðjunni Lækjartorgi. Þar er fjöldi hótela á næsta leiti. Í Pósthússtræti eru Hótel Borg, þar sem meðalverðið hefur undanfarið numið $ 306. Og Hótel 1919, þar sem það hefur verið $ 294, hvort tveggja samkvæmt TripAdvisor. Ódýrari herbergi eru á Hótel Centrum í Aðalstræti, á $ 220. Svipað verð er á Castle House við Skálholtsstíg, $ 211. Öll þessi hótel fá fjögur gæðastig, sem er það hæsta í bænum. Þau fá vinsamleg ummæli hótelgesta. Annars er algengt að hótel í miðborginni kosti um og yfir $ 400. Viðbrögð notenda þar eru lakari.
