Beztu fiskisúpu ævinnar fékk ég í Fiskfélaginu í Grófinni í hádeginu í gær. Rosafína kókossúpu með humri og kræklingi, kostaði bara 1490 krónur. Góðir voru átta bitar af blönduðu sushi, 1290 krónur. Fín var hægt elduð og taðreykt bleikja með fennikel, kryddbrauði, súrmjólkurís og humarfroðu, 1990 krónur. Steiktur saltfiskur með kartöflustöppu og chorizo pylsu var lakari en í fyrra, 1990 krónur, allt of saltur. Eftirréttablanda var á 1180 krónur, þolanleg, en með mikilli froðu. Eldhúsið er stolt af froðugerðarvélinni. Þjónusta flott, matreiðsla djörf og stíllinn fínn. Mun dýrara er á kvöldin.
