ÁRNI MAGNÚSSON hagaði sér eins og bulla, þegar hann varð ráðherra, taldi sér kleift að sýna mátt sinn og megin. Nú er eftirleikurinn búinn að ná í skottið á honum með niðurstöðu í Hæstarétti. Árni var ekki fulltrúi nýs tíma og ungs fólks í ríkisstjórn. Hann var frá upphafi einn af forngripunum.
MANNVAL FRAMSÓKNARflokksins líður fyrir grimmd sögunnar. Flokknum tókst ekki að hindra flótta þjóðarinnar á mölina og honum tókst ekki að hindra gjaldþrot samvinnustefnunnar. Hann er orðinn að vinnumiðlun, sem útvegar illa hæfu fólki vinnu hjá hinu opinbera. Ráðherrarnir eru partur af því.
VALGERÐUR SVERRISDÓTTIR höfðar ekki heldur til unga fólks, er alltaf með samanbitnar varir í sjónvarpi og geltir í sífellu eins og hundur að reka úr túni. Segir andstæðinga misskilja allt hundrað prósent og hafa hundrað prósent rangt fyrir sér. Varðhundar í pólitík eru ekki álitleg söluvara.
FRAMSÓKNARFLOKKURINN hefur lítið fylgi í könnunum af ýmsum ástæðum. Málefni hans eru mörg hver útdauð eða úrelt. Allir sjá, að þau hafa vikið fyrir ágirnd í stöður. Þess vegna er flokkurinn kallaður vinnumiðlun. Hann er persónugervingur þess, sem ungt fólk vill sízt sjá í landsmálunum í dag.
HALLDÓR ÁSGRÍMSSON ber hæst í flokknum. Hann fer með skattfé eins og skít, eyðir þeim í sendiráð og aðra fínimannsleiki í útlöndum eða þá til að gefa sjálfum sér eftirlaunaauka og kvóta. Í sjónvarpi og á myndum virðist hann vera illa sofinn og pirraður, nema síðustu tvær vikurnar fyrir kosningar.
JÓN KRISTJÁNSSON virðist afar daufgerður maður, sem helzt kann að búa til lausavísur. Hann þykist vilja vel öldruðu fólki og öryrkjum, sjúkum og slösuðum, en getur aldrei staðið við nein loforð og er alltaf með hala vandamála á eftir sér. Í rauninni er hann að skera niður velferðina.
GUÐNI ÁGÚSTSSON er eini maðurinn í ráðherraliði Framsóknar, sem höfðar til kjósenda. Hann hefur reynzt vera húmoristi innan um fýlupoka flokksins, hvarvetna eftirsóttur sem veizlustjóri og tækifærisræðumaður. Enda er fýluliðið í vinnumiðluninni alltaf að reyna að grafa undan honum.
FYRIR UTAN Guðna er ráðherralið Framsóknarflokksins ekki til þess fallið að afla flokknum fylgis meðal kjósenda.
DV
