Ríkisstjórn Vinstri grænna hyggst hækka eftirlaunaaldur úr 67 árum í 70. Bein árás á fátæka, sem eiga erfiðara en aðrir með að ná endum saman. Ríkisstjórnin neitar að hækka skattleysismörk, sem mundi bæta kjör fátækra. Í ótal smáatriðum saumar hún að fátæklingum til að þurfa ekki að hækka auðlindarentu og auðlegðarskatt. Þetta er ríkisstjórn hinna ríku fyrir hina ofsaríku. Enda hafa Vinstri græn ekki neinn áhuga á vanda hinna fátæku. Hafa aldrei sótt fylgi til verkafólks. Ég hélt þó, að þau gætu staðið í fæturna, þegar upp koma mál af þessu tagi. Stjórn Vinstri grænna setur nýtt heimsmet í vinnukröfum til aldraðra. Átti áður gamla metið.

Samkvæmt fjárlögum þarf Landspítalinn að skera niður um 600 milljónir. Þarf að skera niður þjónustuna, sem því nemur. Þetta er í ráðuneyti Katrínar Jakobsdóttur. Alveg eins og það var í ráðuneyti Bjarna Benediktssonar í og ráðuneyti Sigmundar Davíðs Gunnlaugssonar. Engu máli skiptir, hvort bófaflokkur er í forsæti eða Vinstri græn eru í forsæti. Þetta er allt sama andskotans íhaldið. Allt fyrir þá ríkustu, niðurskurður á þá fátækustu. Þingmenn fá afturvirka 45% hækkun, aldraðir og öryrkjar fá ekki krónu. Engar smáíbúðir byggðar að frumkvæði ríkisins. Þetta kallast að hata aumingjana. Ráðuneyti Katrínar er tóm siðblinda, fólska og lygi.

Tryggustu kjósendur Sjálfstæðis eru þeir, sem flokkurinn fór verst með í hruninu. Skuldsettir eigendur íbúðar eru enn að verða gjaldþrota, níu árum eftir hrun, af völdum Sjálfstæðis. „Ævinlega voru Íslendingar reiðubúnir að kyssa þann vöndinn er sárast beit og trúa því að kaldrifjaðasti böðullinn væri sönnust hjálp þeirra og öruggast skjól“ (HKL). Enda lýsir helzti plottari Flokksins honum á þennan veg: „Það eru engin prinsipp, það eru engar hugsjónir, það er ekki neitt. Það er bara tækifærismennska, valdabarátta.“ (SG). Nú hafa Vinstri græn leitt bófana aftur í valdastólana. Níu árum eftir búsáhaldabyltinguna er allt enn við það sama og áður.

Við erum nízkari á heilsuþjónustu en ríki Vestur-Evrópu. 9,3% landsframleiðslu fer til heilbrigðismála. Stóru ríkin og Norðurlönd eru yfirleitt með 11%, þar af yfir 90% greitt af ríkinu. Við getum hæglega farið upp í sama hlutfall með því að hækka auðlindarentuna. Þá væri hægt að afnema biðtíma og biðlista, fjölga sjúkrarúmum og ráða fleiri starfsmenn. Bófaflokkurinn hefur lengi staðið gegn endurbótum. Páll Magnússon kallar forstjóra Landspítalans „vælukjóa“ og segir spítalann fá of mikið fé á fjárlögum. Páll sýnir vel hugarfarið á þeim bæ. Sjálfstæðisflokkurinn þarf að tapa meira fylgi til að fólk fái sömu þjónustu og Danir og Þjóðverjar.

Á 5000 fésbókarvini og 1000 fylgjendur að auki. Blaðran mín á fésbók er fremur stór. Var að rúlla gegnum það, sem fólk hefur að segja. Reynsla mín er allt önnur en álitsgjafar í fjölmiðlun kvarta um. Meirihluti statusa er að vísu um annað en pólitík. En þeir, sem fjalla um pólitík, eru yfirleitt sanngjarnir og kurteisir. Af þeim má sjá, að stór hópur hefur harðvítugan áhuga á pólitík og skilur, hversu sárt þjóðin er leikin. Í þessum heimi eru fáir, sem hafa trú á bófaflokknum til neinna góðra verka. Þótt 25% þjóðarinnar kjósi fjárglæframenn, eru önnur 25%, sem hafna fjárglæframönnum. Ísland er ekki ennþá alveg ónýtt land. Lifi byltingin.

Ísrael er mesta hryðjuverkaríki heims, að Bandaríkjunum frátöldum. Í sjö áratugi hefur Ísrael þjösnast á Palestínu, skotið íbúa á færi, hrakið þá af landi og eytt húsum þeirra. Allt þjóðfélag Ísraels er meðsekt, Ísraelsmenn eru hryðjuverkamenn, burtséð frá skoðunum manna á gyðingum. Ríki þeirra er krabbamein fyrir botni Miðjarðarhafs, stöðug uppspretta ágreinings milli Bandaríkjanna og ríkja múslima. Allt framferði Ísraels er brot á alþjóðalögum. Yfirtaka þeirra á Jerúsalem er eitt af mörgum brotum. Í gömlu Jerúsalem búa fjórir trúflokkar, múslimar, gyðingar, orþódox kristnir og armenskt kristnir. Þeir eiga allir sama rétt, undir tilsjón Sameinuðu þjóðanna.

Ýmsar stofnanir bjóða upp á litningagreiningu til að meta skyldleika mannkyns, þar á meðal National Geographic. Þú sendir þeim þitt DNA og færð svörin til baka. Eins og aðrir Cro-Magnon Evrópumenn erum við örlítið skyld forþjóðunum Neanderdal og Denisovan. Sú síðari var á sínum tíma nálægt Baykal vatni í Rússlandi, en hrökk síðan í ýmsar áttir út í Suðurhafseyjar og Ísland. Íslendingurinn er að mestu Norður-Evrópumaður, en skyldari íbúum Bretlandseyja en Danmerkur. Það er dálítið merkilegt. Gaman verður að fylgjast með frekari vexti þessara vísinda, svo að skyldleikinn við Norðmenn, Kelta, Baska, Herúla og aðra verði nánar upplýstur.

Asískir matstaðir eru sjaldan merkir, flestir á hádegismarkaði fyrir vinnandi fólk. Ég undanskil sérstaka matreiðslu Japans. Að öðru leyti er krydd aðalmálið í Asíu, ekki fiskur eða kjöt eða grænmeti. í Kína er það til dæmis soya, satay eða hoisin, í Indlandi masala, korma, karrí og tandoori og vindalou. Indverskar sósur eru oftast sterkari og villtari en kínverskar. Austur-Indíafélagið, fínn og dýr staður, er aðeins opinn á kvöldin. Af indverskum stöðum á frekar lágu verði er beztur Bombay Bazaar í Ármúla, áður í Kópavogi. Feitt íslenzkt lambakjöt í Bombay lamb, hrásalat, raita jógúrt eru meðal hins góða í þessum notalegu innréttingum.

Ríkissjóður reynist geta fengið erlend lán með 1% vöxtum. Leysa má hinn mjög svo brýna húsnæðisvanda með því að gera Landsbankann að Sparkasse að þýzkri fyrirmynd. Bankinn verði eini bankinn með ríkisábyrgð og láni almenningi til íbúða með 2% vöxtum. Fyrir lánið verði reistir tugir þúsunda af litlum íbúðum til leigu, búsetu eða eignar ábúenda. Engir milliliðir verði í málinu aðrir en Sparkasse ríkisins, Landsbankinn. Gott væri að fá lífeyrissjóði almennings til að taka þátt í þessu, til dæmis með stofnun búsetufélaga og húsfélaga. Ganga verður þannig frá málum, að óðir gróðafíklar komist hvergi með puttana. Þessi leið þrengir ekki að ríkissjóði.

Upplýst er, að gögnum í sakamáli á hendur kynferðisbrotamanninum Robert Downey var eytt 24. febrúar 2015 hjá lögreglunni á Suðurnesjum. Var ekki hluti af almennri aðgerð, heldur sértæk aðgerð af hálfu einhvers stórhvelis. Ekki er einleikið, hve rækilegur varnarhringur hefur verið sleginn um þennan vandræðamann Flokksins. Samkvæmt lögum má ekki eyða þessum gögnum, heldur afhenda þau Þjóðskjalasafni. En nú nýtast skjölin ekki í nýjum málum gegn Robert. Feril skjalanna og nýrrar æru Roberts þarf að kanna ofan í kjölinn. Var þetta eitthvert sérmál fyrir Engeyinga eða aðra valdaklíku landsins. Fölsun og eyðing gagna er mjög alvarlegur glæpur.

Fjárlagafrumvarp ríkisstjórnar Katrínar Jakobsdóttur er lítilfjörlegt. Aðeins 2%  munur er á því og frumvarpi fráfarandi ríkisstjórnar. Ekki er sjáanlegur munur á velferð, húsnæði og heilsu. Þessir afvelta málaflokkar verða áfram afvelta. Ekkert átak í velferð, allra sízt í velferð gamla fólksins. Ekkert átak í húsnæði, þótt þar sé allt á hvolfi. Um Landspítalann er fátt að segja, sami sparðatíningur og venjulega. Ríkisstjórn íhaldsflokkanna þriggja er í engu frábrugðin þeirri hægri stjórn, sem hún leysti af hólmi. Þetta er ríkisstjórn hinna ríku fyrir hina allra ríkustu. Vinstri græn eru komin á þá endastöð, sem hentar íhaldskjósendum þeirra.

Bónusgreiðslur stjórnenda Klakka og Lykils upp á 60 milljónir króna á mann fara illa í fólk. Eru þær til komnar út af væntingum bankstera til velvildar stjórnar íhaldsflokkanna? Er verið að efna í nýtt hrun? Eru þessir karlar geimverur í eigin blöðruheimi? Auðsöfnunarfyrirtæki virðast ekki hafa lært neitt af hruninu og fara á hvolf í græðgi. Allt eru ímynduð verðmæti, sem verðlögð eru upp úr öllu valdi. Þessa siðblindu bankstera þarf að stöðva strax. Níu ár eru liðin frá hruni, án þess að neitt hafi verið gert til að girða af siðblinduna og koma helztu bófunum í varanlegt fangelsi. Líklega mun stjórn Katrínar ekki snerta á þessu stórvandamáli.

Styrkur MeToo hreyfingarinnar kom mér eins og sumum öðrum á óvart. Við höfum lifað miklar breytingar á samskiptum kynjanna á þessari öld, meira jafnvægi í pólitík og menntuðum stéttum. MeToo er þó mesta byltingin og mun gerbreyta þessum samskiptum. Hún verður mesta framför kvenna í sögunni. Hundruð og þúsundir kvenna hafa sagt frá óþægilegri og óbærilegri hegðun margra karla, sem ég kalla flagara. Hegðunin er miklu útbreiddari og óbærilegri en mér gat dottið í hug. Málið er svo þungvægt, að skipuleggja þarf kennslu í mannlegum samskiptum í skólum landsins. Setja þarf skýra línu milli daðurs og dólgsku, sem konur hafa lýst í átakanlegum sögum sínum.

Nú raðast inn upplýsingar um ofbeldisglæpi í Danmörku, Noregi og Þýzkalandi. Í ljós kemur, að strákar af ættum múslima bera hlutfallslega mesta ábyrgð á slíkum glæpum. Sérstaklega súnnítar af trúflokkum salafída og wahabíta. Ofbeldishneigð er einkum rík hjá þeim, sem taka þátt í hryðjuverkahópum í Sýrlandi og flytja síðan aftur til Evrópu. Börn í þessum hópi eru einna hættulegust. Allur þorri múslima er friðsamur og lagast að nýjum heimi. Þótt hinir séu fáir, kannski bara 1% múslima, gætu þeir verið 1-2 hér á landi. Mikilvægt er, að þeir haldi ekki í kvenhatur og miðaldasiðferði. Og lagist sem bezt að siðum og reglum í löndum, sem þeir flýja til.

Aftenposten

Nýja skákforritið Alpha Zero gersigraði heimsmeistara tölva, Stockfish, 28-0, í 100 skákum. Stockfish teflir eins og beztu skákmenn, Alpha Zero eins og geimvera. Stockfish teflir jafnteflislega, en Alpha Zero teflir eins og brjálæðingur. Fórnar peðum og mönnum út og suður til að ná taktískum yfirburðum í stöðu. Alpha Zero lærði nefnilega bara mannganginn og lét alla sögu skáklistar eiga sig. Kenndi sér sjálf skáklistina, kastaði út mannkynssögu hennar. Leikur furðulega leiki, sem reynast innsæir. Alpha Zero kann ekki bara splunkunýja skák, heldur leikur sömu listir í annars konar forritun. Tölvan er komin fram úr fólki og tekur við af því.