Spurningalistar fjölmiðla fyrir kosningar brengluðu pólitískt útsýni fólks. Var látið meta samhljóm í stefnuskrám flokka og sínum skoðunum. Alveg tilgangslaus samanburður. Stefnuskrár flokka eru einskis virði. Það getur fólk raunar séð með samanburði stefnuskráa fyrri kosninga við efndir loforða eftir þær. Stefnuskrá Sjálfstæðisflokksins er til dæmis jafnan í andstöðu við gerðir flokksins. Allir bjóða „alls konar fyrir aumingja“, en flestir gera fátt í því. Þótt spurninga-listar fjölmiðla hafi skemmtigildi, eru þeir villandi í samanburði við vilja og skoðanir kjósenda. Næst þarf að vanda þá betur, miða við efndir, ekki við loforð.

Guðlaugur utanríkis er barnalegur Bretlandsvinur. Væri gott í meira hófi, Bretar eru ekki nein sérstök fyrirmynd. Hafa ítrekað sýnt okkur margfalt meira ofbeldi en aðrar þjóðir. Í Evrópusambandinu er Bretland á jaðrinum, reynir mest að spilla fyrir. Í staðinn hafa meginlandsríkin tekið völdin, einkum Þýzkaland. Það byggist á hinum ofsaflotta fíniðnaði í Þýzkalandi og sparsemi þarlendra í meðferð fjár. Í Bretlandi er iðnaður að mestu hruninn og allt byggist á bönkum og braski. En nú eru bankarnir að flytja til Frankfurt, þar sem er aflvél Evrópu. Bretar fóru verst með sig á tíma Thatcher og Blair. Meðan Þjóðverjar héldu sig við norræna velferð.

Eftir á að hyggja voru kosningarnar vonbrigði. Datt að vísu ekki í hug að kjósa Vinstri græn. Það gerðu þó margir, sem ég þekki. Almennt hafa þeir síðan ekki verið mönnum sinnandi. Mest snýst hugsunin um Katrínu, sem margir höfðu tekið trú á. Þeim er óbærileg hugsunin um að hafa verið höfð að fífli. Því fleiri dagar sem líða, þeim mun grimmar sígur inn ósigurinn. Katrín blekkti kjósendur sína, á því er enginn vafi. Fyrstu tilraun hennar um stjórn með Samfylkingunni, Framsókn og Pírötum var ekki ætlað að takast. Auðveldlega hefði komið í ljós, að hægt væri að bæta Viðreisn og Flokki fólksins við. Mun léttara en núverandi stjórnarmyndun.

Stephen Hawking, eðlisfræðiprófessor við Cambridge, telur, að mannkynið geti liðið undir lok vegna tæknilegra framfara. Fljótt fari gervigreind að keppa við greind mannkyns. Endi með því að fara framúr henni. Byrji að geta endurbætt sig sjálf án hjálpar mannkyns. Það verði nýtt lífsform, sem ryðji mannkyni til hliðar. Ef þetta gerist ekki, muni mannkynið spilla og eyða lífsafkomu sinni. Við séum sjálf ófær um að gæta Móður Jarðar. Ekki kemur fram hjá Hawking, að sigur gervigreindar geti bjargað Jörðinni með skynsamlegri ákvörðunum. Þar á meðal með því að útrýma fólki, áður en það gerir jörðina óbyggilega. Hvernig væri að láta sig hlakka til þess?

Eftir aldagamla hjálpsemi Dana urðu Íslendingar fullvalda 1918. Fyrsti ráðherrann var Hannes Hafstein. Hann lagði grundvöll að klíkuveldinu, þar sem sýslumannssynir urðu Stéttin og sjómenn og landverkafólk varð Undirstéttin. Stríðin í útlandinu björguðu fjárhag hinnar fullvalda þjóðar fyrstu áratugina. Stóra hrunið varð ekki fyrr en 2008, þegar vitgrannir pólitíkusar og seðlabankastjóri leyfðu bönkunum að fara á hvolf. Varnir amatöra reyndust vera fát, fálm og fúsk. Flestir treystu á reigðan Davíð, sem reyndist mesta fíflið. Nú er að ljúka árinu 2008 og pólitíkin komin í súrrealískt hjónaband við bófaflokka kvóta og áls. Hjálp, Danmörk, hjálp.

Skelfileg er þessi ríkisstjórn, sem er verið að mynda. Stærsti flokkur hennar er bófaflokkurinn. Ráðherraefni fjármála er prinsinn af Panama. Aðalráðherra þriðja stjórnarflokksins er sá, sem eyðilagði Fiskistofu. Útkomuna sáuð þið í Kastljósi í vikunni. Engin siðferðileg viðmið koma til álita á þessum bæjum. Guðfaðirinn eða Toto Riina hennar er kvótagreifinn samanlagður, sem stelur hundrað milljörðum árlega á hækkun í hafi. Talsmaður stjórnarmyndunar er Björn Valur, varaformaður Vinstri grænna. Hann ræðir þetta eins og um heiðarlegt fólk sé að ræða. Ég sé hins vegar fátt nema skrímsli og blóðsugur kvótans. En þjóðin vill bara sjá Katrínu.

Geir H. Haarde fór erindisleysu til Strasbourg. Evrópski dómstóllinn úrskurðaði, að málsmeðferð hafi verið lögum samkvæmt. Geir var engum órétti beittur. Augljóst er af meintu símtali hans og Davíðs Oddssonar, að þeir voru báðir úti að aka eins og hverjir aðrir leikmenn síðasta kortérið fyrir hrun. Litlir karlar voru að gera út um mál, sem var þeim mörgum stærðarflokkum ofauki. Davíð var sekari aðilinn, því hann átti að passa gjaldeyri Seðlabankans. Í staðinn fleygðu þeir restinni af gjaldeyrinum í Kaupþing, sem báðir voru sammála um, að ekki gæti endurgreitt. Hrikalegt dæmi um, hvernig fát, fúsk og vanhæfni hafa einkennt stjórnvöld allan fullveldistímann.

Stundum sé ég þá skoðun, að áreiti gegn konum stafi af glannalegum klæðnaði þeirra sjálfra og annarri framgöngu. Nú er slík umræða hafin hér á landi. Virðist snúast um, hvers konar ljósmyndir séu of freistandi áhorf fyrir miðaldra karlmenn. Það liggur við, að hægt sé út frá því að staðlasetja hæfileg hálsmál og pilsasíddir. Var raunar mælt í siðavöndum skólum í Bretlandi snemma á síðustu öld. Erfitt er að sjá, hvernig ákveðnar síddir geti raskað sálarheill íslenzkra siðapostula svo mjög, að þeir komi með kvartanir sínar á opinberan vettvang. Þarf ekki að veita körlum áfallahjálp, ef þeir fá sáðlát við að fletta auglýsingum stjórnmálaflokka?

Kvikmynd og lýsing skipverja á frystitogaranum Kleifabergi staðfestir almennt orð á, að brottkast sé rekið skipulega á kvótaskipum. Afneitanir bófaflokks kvótans, Hafró og almannatengla bófanna á fjölmiðlum duga ekki lengur. Kvótakerfið og vandi þess er öllum ljós. Hann er skelfilegur og má kalla landráð af hálfu þessara aðila og pólitíkusa og flokka, sem hafa stutt hann. Kvótagreifar láta sjálfir vigta aflann. Annað eftirlit af hálfu Hafró er í henglum. Tölur og gröf hennar eru meira eða minna ímyndanir af ásettu ráði, landráð. Hefur skaðað auðlindina verulega og sumpart varanlega. Fjöldi manns er flæktur í þessi umsvifamiklu landráð.

Vinstri græn hafa ákveðið, að Sjálfstæðisflokkurinn sé stjórntækur. Að bófaflokkur megi vera valdamesti flokkur landsins með sterk tök á stjórnsýslu og dómstólum. Að þagga megi niður í óþægilegum fjölmiðlum, sem vilja fjalla um viðskiptavafninga og spillingu formanns bófaflokksins. Að einn af mestu fjárglæframönnum landsins verði ráðherra fjármála. Að hann megi stinga skýrslum undir stól að eigin geðþótta. Að hann komist hjá sköttum með að geyma fé í skattaskjólum. Hann og dómsmálaráðherra hans reyni að þagga niður í fórnardýrum kynferðisbrota. Vinstri græn hafa ákveðið að bjarga ferli Bjarna Benediktssonar og styrkja ofurstöðu Sjálfstæðisflokksins.

Í allri Vestur-Evrópu mun andúð á múslimum aukast verulega á næstu árum. Nálega öll lönd hafa trassað aðlögun hælisleitenda. Hafa komið þeim fyrir í Breiðholtum heimsins. Heimilisfeður og synir eiga erfitt með fá vinnu og halda henni. Þetta á að vera hægt að gera mun betur. Íslam er að vísu afleit trú, með miklu gildismati frá karlrembu og feðraveldi miðalda. Synir leiðast sumir út í ofbeldi og aðra glæpi, varða fallbyssufóður róttækra hatursmanna vestræns gildismats. Margfalt dýrara er að siða múslima vestrænt en aðra og lítill skilningur á þeirri nauðsyn. Því mun spennan vaxa og leiðast út í meiri átök, skilningsleysi og brottvísanir.

Margt geta píratar lært af þessum kosningum. Til dæmis, að mikill meirihluti kjósenda vill litlar eða engar breytingar. Þjóðin er íhald. Hrædd við breytingar, svo ekki sé talað um byltingar. Í stjórnarsamstarfi kemst þú lengra með litlar breytingar en miklar. Í stjórnarstefnu er miklum breytingum yfirleitt frestað. Töluvert af stefnu pírata eru miklar breytingar, sem fela í sér langtíma-markmið. Ekki er hægt að gera ráð fyrir, að þingmenn pírata geti efnt öll loforð. Úti í mýri eru yfirlýsingar um persónulegt mat á einstökum þingmálum. Við núverandi aðstæður stendur allur þingflokkurinn saman, þótt gaman gæti verið að spöglera.

Lengi hafa pólitíkusar lekið eins og sigti. Því merkilegra er, hvernig Katrínu Jakobsdóttur tekst að láta heilan hóp kjaftagleiðra þegja um gang mála. Stundum segir hún að stjórnarmyndunin gangi vel. Jafnvel þótt hún liggi að mestu niðri um heila helgi. Fólk talar þó saman, er sagt. Ekki er enn upplýst um málefnasamning. Enda spilar hann kannski enga rullu. Þó er farið að tala um stóla, sem er kjarni málsins. Katrín verður forsætis og Bjarni kannski fjármála. Lengra nær það ekki, En fólk spjallar um, að það sé löngu ákveðið ferli. Hafi líklega byrjað í fyrra. Katrín segir ekki satt orð og kemst upp með það. Teflonið hennar virkar enn.

Tilraun Katrínar Jakobsdóttur til ríkisstjórnar með bófaflokknum og Framsókn er feigðarflan. Fylgið hrynur af flokki hennar. Komizt hefur upp um Vinstri græn sem íhald, arftaka Þjóðvarnarflokks og Möðruvellinga, hvorki vinstri né græn. Síðan herinn flúði, hefur VG lítinn tilgang. Er að minnsta kosti ekki sósíal. Hvernig sem þessar viðræður fara, verður flokkurinn tapari. Annað hvort varahjól bófa eða meðal jafningja í stjórn smáflokka. Hið mikla traust Katrínar er gufað upp, er fólk sá, að fyrsta tilraun hennar var öll í plati. Teflon er ekki án enda. Trúin bliknar, þegar ekkert gengur, samt daglega allt sagt vera í góðum gír og gangi.

Könnun sýnir 40% fylgishrun Vinstri grænna á tíma stjórnarmyndunarviðræðna. Bara 60% flokksins halda tryggð við hann. Og helmingur þeirra, sem eftir sitja, vilja sízt af öllu fá Sjálfstæðisflokkinn í stjórn. Unga fólkið á höfuðborgarsvæðinu yfirgefur Vinstri græn. Eftir situr flokkseigendafélagið með kvótagreifana og vinnslustöðvar búvöru á bakinu. Samfylkingin fiskar upp obbann af flóttafólkinu og Píratar restina. Svo virðist sem ekki muni allir þingmenn flokksins fylgja honum inn í kastala íhaldsins. Flokkseigendur eru að missa tök. Plottið stóra er að riðlast. Ungir sjá gegnum breitt bros Katrínar og sjá flokkseigendur að baki.