Sjálfstæðisflokkurinn flykkir sér að baki Bjarna Benediktssyni. Framámenn þar á bæ segja hann ekki hafa gert neitt ólöglegt. Það er að vísu ekki vitað enn. Hitt er víst, að formaður flokksins og öll hans ætt hefur verið og er á kafi í grófri siðblindu, sem hæfir ekki pólitíkusi og allra sízt forsætisráðherra. En líklega skiptir það kjósendur ekki máli. Þessi 22% þjóðarinnar, sem enn þverskallast samkvæmt skoðanakönnunum, eru bara kjósendur, sem láta sig siðblindu engu varða. En það eru þó um 50.000 kjósendur, sem eru haldnir siðblindu að meira eða minna leyti. Restin af þjóðinni þarf að einbeita sér að því að losna við bófaflokkinn.

Bjarni Benediktsson seldi allar eignir sínar í Sjóði 9 hjá Glitni dagana 2.- 6. október 2008. Til dagsins, sem Geir kom með neyðarlögin og bankarnir hrundu. Það segja heimsblaðið Guardian, Reykjavík Media og Stundin í morgun. Bjarni sat þá fundi um alvarlega stöðu bankanna og seldi bréf fyrir 50 milljónir króna. Alls seldi Bjarni bréf í Glitni fyrir rúmlega 120 milljónir króna eftir fundi með Lárusi Welding, bankastjóra Glitnis. Slíkt innherjamál setti Baldur Guðlaugsson í tveggja ára fangelsi. Ekki er ljóst, hvað verður með Bjarna, en ljóst er, að siðblindingi getur ekki lengur þvælst fyrir í pólitík með sína skítugu putta.

Sjálfstæðisflokkurinn berst fyrir, að ofsaríkir verði enn ríkari og fátækir fái aldeilis að kenna á því. Hann er eins og talsmenn flokksins í fjölmiðlum. Þeir skrifa um fátæka sem aumingja og um skattbyrði af þeirra völdum. Raunar telja þeir margs konar ólán, svo sem örorku og húsnæðismissi, vera refsingu guðs fyrir að vera aumingi. Erlend börn, sem hafa verið á flótta frá fæðingu, fá skammir fyrir að leita hælis hér á landi. Meðan almenningur furðar sig á mannvonzku innanríkisráðherrans, lofa talsmenn ráðherrann fyrir að hafna allri samúð. Það er greinilegt, að siðblinda er sjálft burðarvirkið í Sjálfstæðisflokknum.

Rangt er að tengja ójöfnuð við tekjumun. Fólk verður ekki ríkt af háum tekjum. Reynslan sýnir, að auður verður til af aðgangi að fjármagni. Fólk getur keypt og selt af sjálfu sér. Það getur hækkað verð í hafi. Það getur svikið undan skatti með millifærslum gjaldeyris. Heldur þú að frú Sigmundar borgi útsvar? Auðvitað ekki, en það gera skúringakonur. Árlega söknum við fjölda fólks af skattskrá, það borgar litla eða enga skatta. Á því verður fólk ríkt. Þess vegna á að tengja ójöfnuð við eignamun. Ekki bara við innlendar eignir, heldur líka í bönkum í skattaskjóli á aflandseyjum. Ekki rugla umræðuna. Ríkir hafa ekki launatekjur.

Einn er skattamunur á Sjálfstæðisflokknum og vinstri flokkum. Sá fyrstnefndi hækkar skatta á þá, sem minnst mega sín, samanber fjárlagafrumvarp ríkisstjórnar Bjarna Benediktssonar. Þannig hefur það ætíð verið í stjórnartíð bófaflokksins. Vinstri flokkar hækka hins vegar skatta á þá ríkustu, samanber auðlegðarskatt og auðlindaskatt. Baráttan á alþingi snýst annars vegar um þessa stéttaskiptingu og hins vegar um eitrun ríkiskerfisins. Sjálfstæðisflokkurinn hleður sínu liði á alla pósta ríkisins og býr til nýja. Hann umgengst lög og reglur af fullkomnu ábyrgðarleysi. Hann drepur alla flokka, sem hann notar sem hækjur. Hreint eitur.

Hækkandi sól Vinstri grænna gefur von um, að lokið sé valdaskeiði bófaflokksins. Það eitt mundi nægja til gleðjast yfir kosningunum í lok mánaðarins. Aðkoma Sjálfstæðisflokksins að pólitík snýst ekki um hana, heldur um herfang. Ekki er mark á einu orði takandi í stefnu bófaflokksins, hann hefur allt annað í huga. Að öðru leyti er ekki búið að innleiða neitt himnaríki á vegum Vinstri grænna. Flokkurinn er að mörgu leyti íhald í þjónustu kvótagreifa og vinnslustöðva. Og efast um nýja stjórnarskrá. Eins og oft verður ekki við öllu séð. Vinstri græn eru stór bati að lokinni bófastjórn. Stundum sættist þú við eitt skref í einu.

Hagstofan hefur reiknað út, að 10% þjóðarinnar á tekjubotninum hafa minna en 381 þúsund krónur í mánaðartekjur. Þetta er ekki til að lifa af. Þarna er launafólk, t.d. við barnagæzlu, svo og aldraðir, öryrkjar, sjúklingar, líka húsnæðislausir. Öllum þeim þarf að lyfta upp í framanskráðar 381 þúsund krónur til þess að geta lifað af. Þetta eru fátækramörkin í landinu. Þýðir, að ríkið þarf að setja upp 381 þúsund krónur í lágmarkslaun fyrir alla. Nú eru lágmarkslaun miklu lægri, 280 þúsund. Þau eru skandall. Féð má fá af auðlegðarskatti og auðlindarentu og skatti á skattsvik Panamagreifa. Raunar mætti rúnna lágmarkslaun af í 400 þús.

Þrátt fyrir Fréttablaðið og Morgunblaðið höfum við enn alvörufjölmiðla á borð við Kjarnann, sem grafa upp sannleikann. Morguninn eftir sjónarspil Sigmundar Davíðs var Kjarninn búinn að tæta allan málflutning sjónhverfingamannsins. Þegar upp komst um Wintris, breytti hann skattskýrslunni. Krafinn um endurgreiðslu, en fannst krafan of há. Kærði einn hluta, uppgjör Wintris í krónum með gengistapi. Fékk það að einhverju leyti viðurkennt, svo krafan var lækkuð um 50 milljónir. Úr mun hærri tölu, sem enn er leyndó. Allt málið er rakið skref fyrir skref í Kjarnanum og blaðra lygarans varð aldrei blásin út. Frussaði út og dó í fæðingu.

Birgitta Jónsdóttir var ekki fyrr hætt á Alþingi en henni skaut upp í hópi eftirlitsmanna með kosningunum í Katalúnju. Í gær átti hún fund með forsetanum þar, Carles Puigdemont. Birgitta er höfðinu hærri en annað forustufólk Pírata og tveimur höfðum hærri en almennir þingdvergar. Það er von, að hún sé kölluð óstjórntæk. Það er nýyrði yfir þá, sem sætta sig ekki við spillingu. Ísland er of lítið fyrir hana, fullt af undirmálsfólki. Alvörufólk kemst ekki til valda á Íslandi vegna fávita. En úti í heimi er hún eini Íslendingurinn, sem pólitíkusar þekkja. Vont var að missa hana úr íslenzkri pólitík, en gott fyrir útlandið.

Falangismi Mariano Rajoy, forsætisráðherra Spánar, er búinn að vera. Sjónvarp um allan heim hefur sýnt ofbeldi spænska þjóðvarðliðsins í Katalúnju. Þjóðvarðlið á að verja fólk, en á Spáni beitir það kylfum og táragasi á almenning. Katalúnar, sem í fyrradag voru að hálfu fylgjandi aðild að Spáni, eru í dag yfirgnæfandi á móti aðildinni. Carles Puigdemont, forseti Katalúnju, mun leggja frumvarp um sjálfstæði fyrir þing landsins. Rajoy og falangistar hans hafa með ofbeldi sínu misst málið úr höndum sér. Er komið í sjálfstætt ferli, sem ekki verður snúið við með ofbeldi. Það segir alla söguna, að kosningarnar í Katalúnju tókust.

Sigmundur Davíð mun því miður græða fylgi á stóru bombunni. Var saklaus, en af hverju? Hann mátti gera Wintris upp í krónum árum saman, þótt peningarnir hafi verið reknir erlendis. Vegna þess eru álagning á Wintris-hjónin lækkuð um 50 milljónir. Samkvæmt íslenzkum lögum má spara skatt með að útvega sér gengistap, segir nefndin, en ríkisskattstjóri hafði hafnað. Ekkert kemur fram um, hversu mikið álagning hafði verið hækkuð vegna tilfæringa þeirra hjóna umfram bókhald. Þau voru fjölmörg. Árum saman voru skattar ekki rétt metnir í bókhaldinu gráa. Sigmundur Davíð er sérfróður í að þyrla upp ryki, þykjast ofsóttur sakleysingi.

Einkaframtakið hefur sýnt undanfarin misseri, að það er ófært um að sjá fólki fyrir húsnæði. Sambandslaust er milli tekna fólks og húsnæðiskostnaðar. Ég hélt, að ríkisrekstur hentaði bara heilsustofnunum og skólum, vegum og flugvöllum. En innviðir samfélagsins eru fleiri, þar á meðal húsnæði. Bezt er, að ríkið taki að sér frumkvæðið og stofni hagnaðarlaus húsnæðisfélög í samstarfi við sveitarfélög og aðra. Komið hefur í ljós erlendis, að einkavæðing heilsuþjónustu veldur auknum heilsukostnaði og það virðist líka eiga við um húsnæði. Við erum komin á þá öld, að fólk fattar, að einkavæðing er tálsýn, sem eykur vandræði almennings.

Fyrir rúmlega hálfu ári birti ég hér númeraðan lista yfir tíu beztu veitingahús borgarinnar. Hér kemur nýr listi, að þessu sinni ónúmeraður. Listinn er þéttari en áður og erfiðara að gera upp á milli staða. Nýir á listanum eru Essensia, Ostabúðin, MatWerk, Von (Hafnarfirði), allir með fyrsta klassa matreiðslu á fiski. Fyrir á listanum eru Sjávargrillið, Fiskfélagið, Matarkjallarinn, Matur & drykkur, Kopar og Kaffivagninn. Hér er fædd heimsborg með nægu úrvali afbragðs matarhúsa. Með eðalgóðri matreiðslu, vingjarnlegri þjónustu og notalegu umhverfi. Munið samt að fara í hádeginu, því þá er lágt verð á fiski dagsins.

Katalúnar reyna að kjósa í dag um sjálfstæði frá Spáni. Lögregla frá Spáni hefur hertekið rúmlega helming af kjörstöðum landsins. Heimamenn hópast í aðra skóla til að hindra yfirtöku þeirra. Yfirvöld í Katalúnju halda fast við þjóðaratkvæði og sæta spænskum ákærum um landráð. Hægri sinnuð stjórn Mariano Rajoy á rætur í falangisma Franco-tímans og hefur haldið of stíft á deilunni. Svipað og Donald Trump heldur of stíft á deilunni við Norður-Kóreu. Á báðum stöðum er hætt við að upp úr sjóði. Katalúnar bregðast sífellt harðar við aðgerðum Spánverja. Alveg skelfilegt væri, ef kosningarnar í dag enda í blóðbaði og morðum í Barcelona.

Almannatenglar hafa ráðlagt tveimur fyrrverandi forsætis að neita staðfastlega tilveru erfiðra mála. Bjarni Ben segir: Ný stjórnarskrá er ekki til. Sigmundur Davíð segir: Við hjónin áttum aldrei fé á aflandseyjum. Svo er þetta endurtekið eins og þurfa þykir. Þannig stimplast orðavalið inn hjá rétttrúðum, þótt aðrir viti betur. Fæstir spyrjendur þora að spyrja áfram til að fá upp sannleikann, því það er ekki hægt. Heiðarlegi formaðurinn í Samfylkingunni hlær hins vegar bara og segir: Ég var nakin fyrirsæta í myndlistarkennslu. Málinu er þar með lokið, meðan mál hinna tveggja snýst og snýst. Betra er að segja satt en rangt.