Þótt 90% okkar séu andvíg einkavinavæðingu heilsumála, hamast bófarnir við að magna hana. Um alla borg rísa vasa-sjúkrahús með takmarkaðri ábyrgð. Þau ráða bara við hefðbundin tilvik. Ekki er gert ráð fyrir sjúkrarúmum. Fari aðgerð úrskeiðis, eru sjúklingarnir sendir á bráðagáttir Landspítalans. Ríkið getur séð um það erfiða. Vasa-sjúkrahúsin þarf að leggja niður og tækjavæða Landspítalann í staðinn. Þar er öll sérfræði á einum stað. Þjóðin vill, að Landspítalinn taki frítt við öllum. En ríkiskontóristar Sjálfstæðisflokksins knýja á einkavæðingu, einkum fanatískur forstöðumaður Sjúkratrygginga ríkisins. Gerum hann landrækan.

Skoðanakönnun Gallup sýnir stjórnina með 20 þingmenn. Með Framsókn að auki fara þau upp í 27. Þá vantar Flokk fólksins til að fara upp í 34 menn. Sjálfstæðis hatar aldraða, öryrkja, sjúka og húsnæðislausa. Því er úr vöndu að ráða. Flokkur fólksins hatar hælisleitendur. Hvor bakkar? Sjálfstæðis bakkar nánast aldrei, samanber núverandi ríkisstjórn. Mun éta Framsókn og Flokk fólksins eins og hann étur núna Viðreisn og Bjarta framtíð. Kannski geta Vinstri græn og Píratar með 23 þingmenn samið við Samfylkinguna og Flokk fólksins og farið þannig upp í 36 þingmenn og meirihlutann. Mildar Flokkur fólksins þá hatur sitt á útlendingum?

Ítrekaður vandi Áslaugar Örnu Sigurbjörnsdóttur þingmanns í dómgreindarbresti á umhverfinu felst í skorti á mati á afleiðingum orða. Þegar hún kvartaði yfir að mega ekki kaupa hvítvín með humrinum, fattaði hún ekki, að humar er utan buddu almennings. Umræðan snerist upp í rík sjálfstæðisbörn í Garðabæ, sem vildu kaupa humar. Ekki um verzlunarfrelsi, heldur um óhóf ríkisbubba. Þegar hún leitaði að löglausu horfi á blóðug slagmál í sjónvarpi, datt hún í sama fattleysi. Umræðan snerist upp í gráðugan vilja hennar að rjúfa eignarétt.  Verndað ungmenni í Garðabæ skortir dómgreind á lífið í landinu utan þorps yfirstéttarinnar.

Margt er skrítið, sem greinir Sjálfstæðisflokkinn frá öðrum stjórnmálaflokkum. Nýlega vakti athygli, hversu langt ráðamenn í flokknum ganga við að greiða götu barnaníðinga. Þar er einhver leyniþráður á milli. Nú síðast vekja athygli ýmis tilþrif við að skekkja niðurstöðu kosninga til þings sambands ungra Sjálfstæðis. Sumir hafa flutt búsetuna til heimilis Martins Eyjólfssonar sendiherra í TISA. Þannig geta þeir kosið sem fulltrúar Heimdallar. Löng er saga Heimdallar á þessu sviði. Frægt var, þegar verðandi arftaki Davíðs sem ritstjóri Moggans, þáverandi viðskiptasiðfræðingur, stóð í braskinu með flugvél í flutningi atkvæðisbærra.

Wikipedia

Global Positive Forum er ráðstefna valdafólks fjármála og stjórnmála heims. Þar er rætt, hve vel gangi að flytja fjármagn frá fátækum til hinna allra ríkustu. Þetta eru samtök auðs gegn almenningi. Umræður eru fyrir luktum dyrum, en þeir duglegustu fá verðlaun. Að þessu sinni var Bjarni Benediktsson efstur á blaði. Hann er sagður hafa staðið sig bezt allra forsætisráðherra að efla stöðu auðs í landi sínu. Aðrir mundu telja þetta vera skammarverðlaun, en Bjarna leið vel, þegar hann tók á móti viðurkenningunni í París í vikunni. Þetta er ein af mörgum áróðursstofnunum þess eina prósents, sem stelur lunganum af auði alls mannkyns.

Ísland er rosalega seintekið í upplýsingum um smíði húsa. Áratugum saman var einangrun klædd innan á steypu, þótt í útlandinu væri vitað, að hún á að vera utan á steypunni. Áratugum saman var steypa notuð jafnframt sem klæðning, þótt í útlandinu væri vitað, að hún er rakadrægt innanhússefni. Áratugum saman höfðu Íslendingar lítinn áhuga á loftræstingu og rakaheldni klæðningar, þótt það væri talinn mikill vandi í útlandinu. Afleiðinguna af hinum séríslenzka æðibunugangi hefur mátt sjá áratugum saman. Fólk hefur bara alls ekki getað séð fyrir sér, að Íslendingar geti lært eitthvað af útlandinu, til dæmis reglum Evrópusambandsins.

Skætingur og orðahnippingar magnast milli stuðningsfólks ríkisstjórnarinnar. Björt framtíð tekur lítinn þátt, enda hafur hún lítið til málanna að leggja. Í Viðreisn hefur í sumar mátt skynja vaxandi urg út af skorti á framgangi mála flokksins. Aðeins mál Sjálfstæðisflokksins nái fram að ganga. En nú síðla sumars hefur skætingur aukizt af hálfu bófaflokksins, einkum í tengslum við hagsmuni sauðfjárræktar. Sjálfstæðisflokkurinn er auðvitað andvígur markaðslausnum á því sviði sem öðrum. Bófaflokkurinn væri réttar nefndur Sovétflokkurinn og Mogginn réttar nefndur Pravda. Flokkurinn sá er hinn stóri vandi ríkisstjórnarinnar.

Sigið hefur á ógæfuhlið stjórnmála síðan Davíð Oddsson tók við landstjórninni. Frá þeim tíma hefur launamunur aukizt og eignamunur margfaldazt. Allar eignir hafa runnið til ríkasta 1% fólks og ekkert til fátækustu 10%. Vinstri flokkar stungu ekki við fæti, föttuðu kannski ekki. Á sama tíma hefur hagsmunahreyfing alþýðunnar, stéttarfélögin, ekki heldur stungið við fæti. Gylfi Arnbjörnsson var burðarás þessa aðgerðarleysis. Einn af Blairistum krata, sem eru strangtrúaðir á kolruglað regluverk kapítalismans. Hefur ekki enn séð ljósið, tuðar um hagvöxt, þegar hundruð milljarða króna fara árlega framhjá hinum svokallaða hagvexti.

Í Evrópu er meirihluti allra þjóða andvígur fjölgun múslima. Og andstaðan við múslima vex. Flokkar eru fyrir löngu farnir að fiska í þeim háværa hópi. Eins og Framsókn í Reykjavík. Eini nýi flokkurinn hér með þingfylgi er Flokkur fólksins, eins konar Sannir Finnar. Pólitík snýst minna um arðrán 1%-hópsins, auðgreifana, meira um múslima. Þetta er umhugsunarefni fyrir alla þá, sem vilja jafna eignir í landinu. Tempra þarf stuðning við íslam í ýmsum þáttum til að auka líkur á aðildinni að vestrænu og trúlausu jafnrétti. Í stórum dráttum þýðir það temprun á multi-kulti. Að sharia víki skilyrðislaust fyrir íslenzkum siðum og lögum.

Spáð var, að flóð á stærð við Houston-flóðið í Texas kæmi á 500 ára fresti. Í rauninni hafa slík flóð komið árlega í þrjú ár. Öfgaveður eru að verða tíðari og stærri en áður var. Tíðni storma og flóða á þessu svæði fer vaxandi. Haraldur Sigurðsson jarðfræðingur segir: „Það er breyting í gangi. Sú breyting er hnattræn hlýnun, en vaxandi tíðni stórrigninga og fellibylja er ein afleiðing hnattrænnar hlýnunar“. Haraldur segir líka að stjórnvöld í Bandaríkjunum stingi höfðinu í sandinn. Hnattræn hlýnun er raunveruleg og veldur öfgum í veðurfari, líka hér á landi. Fræðimenn eru sammála um, að hamfarirnar séu af mannavöldum.

Skelfilegt er að horfa á bófaflokkinn fá þriðjungs fylgi í könnun i borginni. Nægir að vísu ekki til að velta núverandi meirihluta. Er samt langtum meira en sá fjórðungur fylgis, sem flokkurinn fær á landsvísu á sama tíma. Meirihluti borgarstjórnar þarf að gæta að sér, því kosningar nálgast. Taka þarf upp mildari stefnu í skipulagi umferðar. Bæta má aðstöðu gangandi og hjólandi fólks, án þess að leggja steina í götu bíla og bílastæða. Brýnt að losna við Hjálmar Sveinsson úr skipulagsmálunum. Ekki er síður mikilvægt að taka til hendinni í framboði lítilla íbúa fyrir námsmenn og aðra þá, sem aðeins hafa ráð á lítilli íbúð.

Einkennilegt er þetta nána samband Sjálfstæðisflokksins og helztu barnaníðinga landsins. Þeir síðustu tveir og frægustu fengu hraðferð gegnum undarlegt kerfi uppreistrar æru. Og hafa notið eindregins stuðnings helztu talsmanna flokksins á alþingi. Samt hafa þeir ekki sýnt neina eftirsjá eða samvizkubit. Eru jafnvel enn komnir á ferð við að leita fórnardýra. Líklega byggist nána sambandið á sálrænum skyldleika. Barnaníðingar eru sjálfhverfir og siðblindir, nákvæmlega eins og frambjóðendur bófaflokksins og margir kjósendur hans. Eru vanir að fá sitt fram með taumlausri frekju. Eins og kemur vel fram í núverandi ríkisstjórn.

Þróun Evrópu á þessu ári er í átt til meira samstarfs. Sambandið er að losna við Bretland, sem hefur alla tíð verið til vandræða. Aðildin var framhald af gamalli brezkri heimsvaldastefnu, að deila og drottna. Bretland fer illa út úr Brexit fyrir allra augum. Evrópusambandið getur nú snúið sér að öðrum ríkjum, sem þarf að reka, til dæmis Ungverjalandi, sem er úr heimi fasisma. Evrópusambandið þarf líka að þétta stoðkerfi evrunnar sem fjölþjóðlegs gjaldmiðils. Evran lenti í hremmingum í kjölfar gjaldþrotshættu Grikklands, en hefur náð að halda óbreyttum styrk. Ísland á ekki heima í Evrópu, en þarf afar góð samskipti við bandalagið.

Renta er ekki skattur, heldur leiga. Rentan stafar af takmarkaðri auðlind. Áður fyrr var renta mest greidd af landi, sem var og er takmörkuð auðlind. Fólk varð að greiða gjald fyrir afnot af landi, leigu af landi. Land er ekki verðmikil auðlind á Íslandi, því framboð er meira en eftirspurn. Við eigum hins vegar takmarkaðar auðlindir á öðrum sviðum, í fiskistofnum, í ódýru rafmagni og í aðdráttarafli náttúrunnar. Við eigum að átta okkur á verðgildi hinna takmörkuðu auðlinda. Ekki innheimta skít og kanil, heldur leggja á alvöru auðlindarentu í samræmi við markaðinn, til dæmis með opinberum uppboðum á tilteknum aðgangi.

Tveir þingmenn Bjartrar framtíðar segjast ekki hafa nein áhrif á alþingi og annar þeirra ætlar að segja af sér. Theodóra og Nichole geta engan vegin talið mér trú um þetta. Eru hvor um sig í eins manns oddastöðu í þingmeirihluta stjórnarinnar. Áhrifaleysi þeirra er sjálfskapað. Líklega trúa þær frekjuhundum Sjálfstæðisflokksins, sem linnulaust lýsa frati á orð samstarfsflokkanna. Hvorki Viðreisn né Björt framtíð koma neinum málum fram, því þau þora ekki. Frumvörp eru samin af embættismönnum Sjálfstæðisflokksins. Einn þingmaður meirihlutans getur auðveldlega stöðvað öll slík mál. En til þess skortir djörfung og dug.