Frá Kaldadalsvegi eftir línuvegi norðan Skjaldbreiðar að Þórólfsfelli norðan Hlöðufells.

Löng og leiðinleg hraunslóð og oft gróf eins og háttar til með línuvegi, sem eru auðvitað hugsaðir fyrir bíla. Framhald línuvegarins til austur nefnist hér Skjaldbreiðarvegur.

Byrjum við gatnamót Kjalvegar og Uxahryggjavegar við Hallbjarnarvörður í 360 metra hæð. Slóðin er línuvegurinn norðan Skjaldbreiðar. Hún liggur vestur langa leið, framhjá afleggjara norður í Slunkaríki, síðan sunnan Sandfells og norðan Skjaldbreiðar, þar sem við náum 560 metra hæð. Þar sem Skjaldbreiður nær lengst í norður sker slóðin Skessubásaveg. Við förum línuveginn áfram að fjallaskálahverfi sunnan við Tjaldafell, síðan norðan við Sköflung og norður fyrir Hlöðufell og Þórólfsfell, þar sem er samnefndur skáli.

23,2 km
Árnessýsla

Skálar:
Kaldidalur: N64 26.840 W20 57.711.
Tjaldafell: N64 27.083 W20 39.123.
Þórólfsfell: N64 27.495 W20 30.534.
Kiddakot: N64 25.783 W20 19.131.
Þriðja ríkið: N64 26.410 W20 18.140.

Jeppafært

Nálægir ferlar: Bláskógaheiði, Kaldidalur, Fremstaver.
Nálægar leiðir: Skessubásavegur, Hlöðufell, Farið, Skyggnisheiði.

Skrásetjari: Jónas Kristjánsson
Heimild: Útivistarkort

Frá Kaldadalsvegi og fyrir norðan Skjaldbreið að Hlöðuvöllum.

Leiðin er óviss á köflum, einkum að norðvestanverðu, og þyrfti að varða hana. Kort Björns Gunnlaugssonar frá 1849 sýnir leiðina norðan við Hrúðurkarla, en hún er sunnan við þá. Leiðin á kortinu er vafalaust ekki nákvæmlega sama leiðin og Sturlungar notuðu, en hún er nærri lagi.

Árið 1253 fóru Hrafn Oddsson og Eyjólfur Þorsteinsson úr Hvítársíðu og suður hjá Skjaldbreið um Skessubásaveg og um Miðdalsfjall í misheppnaðri aðför að Gissuri Þorvaldssyni. Sighvatur Böðvarsson á Stað á var bróðir Þorgils skarða og vildi árið 1262 hefna fyrir dráp hans. Hann hitti Sturlu Þórðarson, föðurbróður sinn við Hallbjarnarvörður og fóru þeir saman suður Skessubásaveg og áfram um Klukkuskarð, þar sem þeir fengu óveður. Létu þar fyrir berast um nótt og héldu síðan áfram til Iðufundar við Þorvald Þórarinsson í Skálholti.

Förum frá fjallaskálanum á Hlöðuvöllum í 460 metra hæð og höldum nokkurn veginn í beina línu upp á Kaldadalsveg suðvestan Hrúðurkarla. Fyrst förum við sunnan við Fremra-Mófell og fyrir vestan Sköflung. Síðan sunnan undir Lambahlíðum / Tjaldafelli og norðvestur yfir Fífilvelli, fyrir sunnan Bjarnarfellin og fyrir norðan Sandfellin. Á Kaldadalsveg komum við suðvestan við Hrúðurkarla í 500 metra hæð.

21,9 km
Árnessýsla

Skálar:
Hlöðuvellir: N64 23.913 W20 33.488.

Nálægir ferlar: Kaldidalur.
Nálægar leiðir: Skjaldbreiður, Eyfirðingavegur, Miðdalsfjall, Brúarárskörð, Miðfell, Helludalur, Hellisskarð, Farið.

Skrásetjari: Jónas Kristjánsson
Heimild: Árbækur Ferðafélagsins

Frá Bláfellshálsi að fjallaskálanum í Skálpanesi.

Byrjum á Kjalvegi 35 á Bláfellshálsi. Þar er jeppafær þverleið til norðnorðvesturs fyrir sunnan Geldingafell og síðan norðvestur Skálpanes að fjallaskálanum þar.

7,8 km
Árnessýsla

Skálar:
Skálpanes: N64 33.438 W19 59.465.

Nálægar leiðir: Bláfellsháls.

Skrásetjari: Jónas Kristjánsson
Heimild: Útivistarkort

Frá Króki í Grafningi á Ölkelduhálsleið.

Förum frá Króki suðvestur um Seldal á Selháls, þar sem liggur Ölkelduhálsleið suðvestur að Kolviðarhóli.

3,5 km
Árnessýsla

Nálægar leiðir: Ölkelduháls.

Skrásetjari: Jónas Kristjánsson
Heimild: Herforingjaráðskort

Frá Hveragerði á Ölkelduhálsleið milli Kolviðarhóls og Villingavatns.

Í Reykjadal eru margir hverir, einkum í dalverpinu Hverakjálkum, sem gengur vestur úr dalnum. Frá Brúnkollubletti má fara ýmsar leiðir niður í Grafning.

Förum frá Gufudal við Reykjakot norðaustur upp að Dalafelli og síðan upp vesturhlíðar þess, austan við Reykjadalsá í Djúpagili. Þegar upp í sléttlendi Reykjadals er komið færum við okkur yfir í vesturhlið dalsins upp að mýrasundinu Litla-Brúnkollubletti. Þar komum við á slóðina Ölkelduháls, sem liggur frá Kolviðarhóli að Grafningsvegi við Villingavatn.

5,6 km
Árnessýsla

Nálægar leiðir: Klóarvegur, Ölkelduháls, Hengladalaá, Hellisheiði, Álftavatnsvað.

Skrásetjari: Jónas Kristjánsson
Heimild: Árbækur Ferðafélagsins

Frá Víðivöllum við Ármannsfell um Hrafnabjörg að Biskupsflöt á Lyngdalsheiði.

Við getum ekki rakið þessa leið nákvæmlega, nema við vitum um helztu örnefni á leiðinni. Gott væri, ef hestamenn prófuðu að fara þessa leið eins og hér er lýst. Mikilvægt er að endurvekja leiðina um Prestastíg, því að hún er sögufræg. Hún var farin milli Skálholts og Þingvalla og einnig áfram frá Þingvöllum um Kjósarskarð til Maríuhafnar við Laxá í Kjós. Leiðin, sem sýnd er á meðfylgjandi korti, er samkvæmt árbók FÍ. Betra er að fara austanvert með girðingu frá Víðivöllum að Hrafnabjörgum vestanverðum og fara þaðan beint suður að Dímon vestanverðum. Þannig sleppa menn við girðingar.Þessa leið fór Sturla Sighvatsson til Apavatnsfundar með Gissuri Þorvaldssyni. Beitivellir við Laugarvatnshelli undir Reyðarbarmi voru þekktur áningarstaður að fornu. Þar hittust Kolbeinn ungi Arnórsson og Gissur Þorvaldsson 1238 til herferðar gegn Sturlu Sighvatssyni vestur í Borgarfjörð og Dali. 1. janúar 1242 fór Órækja Snorrason um heiðina á leið í Skálholtsbardaga við Gissur Þorvaldsson. Í febrúar 1253 lenti Þórður Hítnesingur í hrakningum á heiðinni og varð að snúa við til Gjábakka í Þingvallasveit. Fór síðan vestan við heiðina um Búrfell til Skálholts.

Byrjum á Víðivöllum undir Ármannsfelli. Við förum suður um hraunið yfir Prestastíg á Hlíðargjá að eyðibýlinu Hrafnabjörgum. Sú leið hefur ekki verið nákvæmlega kortlögð. Frá Hrafnabjörgum förum við suður yfir Heiðargjá og Hrafnabjargaháls að Dímon norðan Lyngdalsheiðar. Sú leið hefur ekki heldur verið nákvæmlega kortlögð. Síðan fyrir Reyðarbarm til Beitivalla við Laugarvatnshelli. Frá Beitivöllum förum við frá yfir norðausturenda Lyngdalsheiðar að Biskupsflöt og Biskupsbrekkum, þar sem við komum á svonefndan Biskupaveg yfir Lyngdalsheiði. Sá vegur liggur milli Skálholts og Þingvalla.

18,0 km
Árnessýsla

Skálar:
Skógarhólar: N64 17.739 W21 04.807.

Nálægir ferlar: Bláskógaheiði, Kálfstindar.
Nálægar leiðir: Leggjabrjótur, Gagnheiði, Eyfirðingavegur, Skógarkot, Hrafnabjörg, Búrfellsgötur, Dráttarhlíð, Biskupavegur.

Skrásetjari: Jónas Kristjánsson
Heimild: Árbækur Ferðafélagsins

Frá Hrauni í Ölfusi um ósa Ölfusár að Egilsstöðum í Ölfusi.

Förum frá Hrauni eftir vegarslóða suðaustur að Ölfusá. Síðan út í ána og norðaustur eftir leirum að Nauteyri. Síðan norðaustur eftir eyrinni og svo vestan við Álftarhólma og Lambey. Beygjum til austurs fyrir norðan Lambey. Fylgjum ströndinni austur að þjóðvegi 375 við Egilsstaði og Auðsholt.

8,8 km
Árnessýsla

Erfitt fyrir göngufólk

Nálægar leiðir: Skóghlíð, Trölladalur.

Skrásetjari: Jónas Kristjánsson
Heimild: Árbækur Ferðafélagsins

Frá Þóroddsstöðum í Grímsnesi að Mosfelli.

Framhald Biskupavegar yfir Lyngdalsheiði.

Förum frá þjóðvegi 37milli Neðra-Apavatns og Þóroddsstaða austur um sumarhúsahverfi og síðan austsuðaustur í átt að suðuröxl Mosfells og loks um kirkjustaðinn Mosfell að þjóðvegi 35 í Biskupstungum. Þaðan er stutt að brúnni á Brúará hjá Spóastöðum.

7,0 km
Árnessýsla

Nálægir ferlar: Biskupavegur

Skrásetjari: Jónas Kristjánsson
Heimild: Kortavefur LH

Frá Hlöðuvöllum um Miðfell til Úthlíðar.

Ein af mörgum leiðum frá Hlöðuvöllum til byggða. Þaðan liggur meginleið hestamanna sunnan Skjaldbreiðar til Skógarhóla. Einnig Skessubásavegur á línuveginn norðan Skjaldbreiðar eða norðvestur á Kaldadal. Ennfremur leiðir beggja vegna Hlöðufells og Þórólfsfells norður til áðurnefnds línuvegar. Niður í Bláskógabyggð liggja nokkrar leiðir. Austast er leið um Hellisskarð og áfram austur að Helludal og síðan að Geysi. Önnur leið um Hellisskarð og suður um Miðfell að Úthlíð. Líka leið suður um Kálfá til Úthlíðar. Um Brúarárskörð til Miðhúsa og leið vestan Rauðafells til Miðdals. Af Þingvallaleið eru leiðir vestan Skriðu inn Langadal, önnur um Klukkuskarð til Hjálmsstaða. Hin krækir út fyrir Skefilfjöll og síðan meðfram Kálfstindum að Stóra-Dímon skammt norðan þjóðvegar 365 um Lyngdalsheiði.

Förum frá Hlöðuvöllum í 460 metra hæð suðvestur yfir Rótarsand í Hellisskarð milli Högnhöfða að vestan og Kálfstinds að austan. Við förum sunnan við hólinn í miðju skarðinu og síðan niður með Högnhöfða. Þegar við komum niður úr skarðinu, höldum við áfram milli hrauns og hlíða undir Högnhöfða og síðan undir Rauðafelli. Hraunið heitir fyrst Svínahraun og síðan Úthlíðarhraun. Á mót við Miðfell beygjum við eftir dráttarvélaslóð þvert austur yfir hraunið að Miðfelli. Við getum síðan farið vestan eða austan við Miðfell og veljum síðari kostinn. Frá fellinu förum við áfram beint suður og niður hallandi skóglendi að bænum Úthlíð.

18,0 km
Árnessýsla

Skálar:
Hlöðuvellir: N64 23.913 W20 33.488.

Nálægar leiðir: Eyfirðingavegur, Skessubásavegur, Hlöðufell, Farið, Helludalur, Hellisskarð, Brúarárskörð, Klukkuskarð, Miðdalsfjall.

Skrásetjari: Jónas Kristjánsson
Heimild: Útivistarkort

Frá Hlöðuvöllum um Miðdalsfjall að Miðdal.

Jeppaslóð, sem fylgir fjöllum milli Laugarvatns og Hlöðuvalla. Flestar aðrar slóðir á svæðinu fylgja dölum og völlum og skörðum milli brattra fjalla. Þetta er greið og fljótriðin leið, en hæðarmunur er samt töluverður.

Árið 1253 fóru Hrafn Oddsson og Eyjólfur Þorsteinsson úr Hvítársíðu og suður hjá Skjaldbreið um Skessubásaveg og um Miðdalsfjall í misheppnaðri aðför að Gissuri Þorvaldssyni.

Förum frá fjallaskálanum á Hlöðuvöllum í 460 metra hæð suður milli hrauns og hlíða eftir jeppaslóð um vesturjaðar Rótarsands. Slóðin heldur áfram upp brekkurnar norðvestan Rauðafells og suður með fellinu. Við beygjum síðan eftir slóðinni vestur á Miðdalsfjall, þar sem við förum hæst í 680 metra hæð. Förum framhjá Gullkistu, reisulegri klettaborg. Fylgjum síðan slóðinni suður af fjallinu og niður brattar brekkur og sneiðinga að Miðdal í Laugardal, i 90 metra hæð.

21,0 km
Árnessýsla

Skálar:
Hlöðuvellir: N64 23.913 W20 33.488.

Jeppafært

Nálægar leiðir: Eyfirðingavegur, Skessubásavegur, Hlöðufell, Farið, Helludalur, Hellisskarð, Brúarárskörð, Klukkuskarð, Miðfell.

Skrásetjari: Jónas Kristjánsson
Heimild: Útivistarkort