Kári Stefánsson séní er sannur Íslendingur, borgar ekki. Varnir í málaferlum verktaka eru hans list. Njáls saga verður að koti í samjöfnuði við villuna í Skerjafirði. Kári er í málaferlum gegn öllum, sem komu að smíðinni. Jafnvel gegn lagatæknum, sem hann notaði gegn verktökunum. Í einu máli tókst sátt, en flestum tapaði hann, ef ekki öllum. Dómstólar eru enn með stafla af málum vegna villu Kára. Til himinhæða stefnir lögfræðikostnaður hans, á endanum dýrari en villan. Sá kostnaður dæmist líka á Kára. Sennilega lítur hann á það sem herkostnað við rekstur listgreinar, sem einkenndi stórbændur um aldir.
