Vefur sigrar pólitík

Nýmiðlun
Vefur sigrar pólitík

Joe Trippi, The Revolution Will Not Be Televised, 2004

Framboð Howard Dean kom á réttum tíma. Fjórir áratugir spillingar höfðu breytt lýðræðinu í auðræði, þar sem 0,25% íbúanna stjórnuðu öllu í krafti fjármagns til kosningabaráttu. Sérhagsmunir réðu öllu og fólk hafði misst áhuga á pólitík.

Hundruð þúsunda manna tóku á vefnum þátt í kosningabaráttu Dean. Þetta var krafaverk. Öll fyrirtæki, sem verja $20 millj. í sjónvarpsauglýsingar og $20 þús. í vefsíðu, sem lítið breytist, ættu að gæta að sér.

Þegar sjónvarpið kom til sögunnar, hófst spírall niðurlægingar stjórnmálanna. Hann endaði svo, þegar internetið kom. Napster. American Idol. Manila 2001. Kína og sjúkdómarnir. Howard Dean 2003. Tími almannavalds (ekki upplýsingavalds).

Internetið bjargar lýðræðinu. Ekki í framtíðinni, heldur á morgun, í dag. Þú ert næstum að missa af lestinni. Internetið er stofnað af hugsjónanördum til að vera ókeypis afréttur, tilraunastöð í tækniþróun. Bloggið. eBay hefur núna 45 milljónir áskrifenda.

Áhrif sjónvarpsauglýsinga hafa minnkað, af því að þær virkja ekki notandann. Neikvæðar auglýsingar virka neikvætt fyrir báða aðila. Þær eru gagnkvæmt sjálfsmorð frambjóðenda og skilja eftir sviðna jörð.

Hefðbundnir fjölmiðlar tóku ekki eftir Howard Dean. Þeir töldu hann vera marklausan skrítningja. Þeir voru lokaðir inni í hugarheimi, þar sem eingöngu milljarðamæringar eiga séns. Þeir skildu ekki almannavald veraldarvefsins.

Dean-baráttan byrjaði með Meetup.com, sem hélt sambandi fylgismanna á hverjum stað og ákvað mánaðarlegan fundarstað þeirra, t.d. Starbucks. Meetup gerði fólki með sama áhugamál kleift að hittast til að ræða það. Fólkið tók yfir kosningabaráttuna.

Umræðan á blogginu var sjálf kosningabaráttan. Upphafið var andstaða ungs fólks við stríðið gegn Írak, sem pólitíkusar og fjölmiðlar studdu. Fjölmiðlar komu af fjöllum. Einkunnarorð bloggsins hjá Dean voru: The Revolution Will Not Be Televised.

Dean endaði allar ræður á: Ef þú vilt gera eitthvað, farðu þá á Meetup.com. Við leyfðum vefnum að taka völdin. Á hverjum stað skipulagði fólk sjálft kosningabaráttuna. Aldrei hefur önnur eins undiralda komið upp. Enginn fjölmiðill sá undirölduna.

Meðan aðrir frambjóðendur hlustuðu ekki á fólk og reyndu að nota veraldarvefinn til að koma skilaboðum sínum á framfæri, notaði Dean hann til að gera fólki kleift að koma sínum skilaboðum á framfæri.

Veraldarvefurinn er tæki fyrir andmælahreyfingar. Rætur hans liggja í ARPA og hjá hökkurum, sem vildu dreift kerfi, sem enginn gæti stjórnað. Og valdið hatar kerfi, sem það getur ekki stjórnað. Svæðum á borð við Drudge fylgir uppreisnarlykt.

Samhliða samtalinu á netinu gat framboð Dean komið á framfæri óskum um framlög. Ótrúlega háar upphæðir komu samanlagt út úr fjölda smáupphæða.
Ekki er hægt að stýra uppreisn. Hún er fellibylur. Þú getur siglt öldufaldinn og lifað hana af.

Forritið GetLocal var síðar notað í stað Meetup. Fólk gat hlaðið því niður til að slá inn hverfistölu sína og fundið næsta stuðningsfund Dean eða fundið stuðningsmann í hverfinu. Þannig vatt kerfið upp á sig.

Í blogginu fengum við allt, gagnvirkni, stuðning, peninga, allt sem framboð þarf til að lifa af.
Allt efni á blogginu þarf að vera skrifað af einhverjum. Fólk er þreytt á stofnanalegum dreifibréfum frambjóðenda. Í blogginu þarf að vera mannleg rödd.

Hefðbundnir fjölmiðlar eru undir slæðu. Fólk er sannfært um, að þeir segi ekki allan sannleikann. Bloggið er gegnsætt. Ef einhver gerir vitleysu, er strax bent á það. Bloggarinn er samnefnari skoðana og fordóma, það er málið. Hann er klárari en blaðamaður.

Við tókum ekki rugl tröllanna af vefnum. Engin tækni leysir allan vanda. En notendur snerust gegn tröllunum og hófu herferðir fjársafnana merktar viðkomandi trölli. Og þökkuðu síðan tröllinu fyrir að gera þessa peninga kleifa. Sumir hópar fóru í félagsþjónustu.

Þótt framboð Dean hafi kunnað að beita veraldarvefnum, kunni það aldrei á aðra þætti kosningabaráttu. Þar var til dæmis enginn kosningastjóri. Smám saman glutraðist baráttan niður. Menn töluðu af sér á viðkvæmum póstum. Ferð Dean var stórslys.

Skammvinnt framboð Dean vakti fjölmiðla og pólitíkusa af draumi, sýndi þeim, að það væri hægt að gagnrýna stríðið gegn Írak.
Nýr þrýstihópur hefur bæst við alla hina, þrýstihópur almennings. Veraldarvefurinn er voldugri en sjónvarpið og auglýsingar þess.

* David Weinberger: Small Pieces Loosely Joined.
* Lawrence Lessig: The Future of Ideas.
* Howard Rheingold: The Virtual Community. Smart Mobs
* Doc Searles, Chris Locke, Rick Levine: The Clue Train Manifesto.

Við viljum, að fyrirtæki færi valdið til fólks.
Við viljum, að fyrirtæki hlusti á hluthafa.
Við munum aðeins þola fyrirtæki, sem eru góðir samborgarar.
Google sigraði heiminn. Slagorð þess er: Don’t Be Evil.

Auglýsingar á Google eru fáar, lítið áberandi í kantinum og fjalla um áhugamál þín. Google hefur ókeypis heimasíður með síum fyrir ruglpóst. Google kann að gera það, sem fólk vill. Við þurfum ekki fókushópa, ef allir viðskiptavinir geta tjáð sig.

Þau fyrirtæki munu blómstra, sem skilja, að valdið kemur að neðan á veraldarvefnum. Fólk mun hópast um þau, eins og það gerir um eBay og Google. Þess vegna mun Microsoft lenda í vanda. Það hefur ekki opinn kóða og lendir sí og æ í veirum og ormum.

Veraldarvefurinn fæddist frjáls, fyrir það þökkum við Tim Berners-Lee. Richard Stallman hóf frjálsan kóða. Linus Torvalds hóf frjálst stýrikerfi. Þess vegna er Linus næstum laus við veirur og orma. Google hefur búið til frjálst stýrikerfi fyrir farsíma.

Með því að fara yfir á Linux geta tölvuframleiðendur sparað $150 á hverja tölvu. Þegar hugbúnaður á Linux er orðinn nógu víðtækur, má pakka Windows saman. Linux mun sigra að lokum. Google mun líka bjóða opinn og ókeypis hugbúnað alla leiðina.

Framtíðin er í p2p hugbúnaði, frá-fólki-til-fólks. Hann byggist á samvinnu, sem auðgar alla í senn. Napster var upphafið, iPod skiptir máli. Fólk vill vald til að velja.

Eins og kvikmyndaverin reyndu að stöðva myndböndin, hafa eigendur tónlistarréttar reynt að stöðva p2p og hafa í kjölfarið látið valta yfir sig. Fólk er líka farið að stjórna sjónvarpinu í þáttum af tagi American Idol. Munið líka eftir eBay.

Sjö reglur fyrir fyrirtæki:
1) Vertu fyrstur.
2) Haltu hreyfingu gangandi.
3) Hafðu raunverulegt fólk.
4) Segðu sannleikann.
5) Byggðu upp samfélag.
6) Láttu valdið af hendi.
7) Trúðu á fólk.

Með uppreisn á vefnum gátu hluthafar í Disney árið 2004 hrakið einræðisherrann Michael Eisner úr starfi. Slíkt mun gerast í fleiri fyrirtækjum. Hugsanlega í samtarfi við lífeyrissjóði. Google skilur þetta og hvetur til þess. Athugið líka UPS.

Veraldarvefurinn er frjáls afréttur.

ChangeForAmerica.com heitir samstarf, sem aðilar að vefframboði Dean hafa stofnað.
Það byggist á, að samfélag á vefnum snýst um, að menn beri traust til ókunnugra.

Með veraldarvefnum er hægt að vekja athygli milljóna á viðleitni stjórnvalda til að taka hagsmuni þrýstihópa fram yfir hagsmuni alemnnings. Hægt er að framkalla hundruð þúsunda mótmælabréfa:

“Ef þú vilt bætta heilbrigðisþjónustu, skaltu senda þingmanni þínum bréf og segja honum að hlusta ekki á lyfjafyrirtækin, heldur á þig. Hér er skrá yfir lyfjafyrirtæki, sem eru andvíg þér. Hér er skrá yfir lyf þeirra. Og hér er skrá yfir samheitalyf fyrir okkur.”

Tími þrýstihópanna er liðinn. Þeir frambjóðendur, sem taka þá í nefið, munu uppskera stuðning milljóna á veraldarvefnum. Þá er auðvaldið búið að vera. Kosningarnar árið 2008 verða háðar og unnar á veraldarvefnum.
(Þetta er vafasöm fullyrðing).

Vandamál sjónvarps:
* Borgarar í hlutlausum gír.
* Forheimskun kjósenda.
* Spilling stjórnmála.
* Sjónvarpið er ekki fréttamiðill.

Veraldarvefurinn leysir sjálfur sín vandamál. Er vandamálaleysir.

Ræða Trent Lott til minningar um Strom Thurmond 2002. Sagt var frá lofinu á ABC. Mikil reiðialda reis á vefnum. Lott varð að segja af sér. Byltingin er þegar hafin. Árið 2004 voru fjórir ofurbloggarar komnir með sama upplag samtals og New York Times.

Blaðamenn byrja núna daginn á því að lesa bloggið. Árið 2001 var bloggið fyrsti fréttamiðill 3% fólks, árið 2003 var hlutfallið komið upp í 26%. Hvar voru líka Nightline og 60 Minutes, þegar Bush talaði um gereyðingarvopn í Írak?

Hlutverk hefðbundinna fjölmiðla á tímum stríðsins gegn Írak hefur verið svipað og var í annarri heimsstyrjöldinni. Dagblöð og sjónvarp eru á undanhaldi. Fólk fyrirlítur hefðbundna fjölmiðla og snýr sér að tölvunni.

Veraldarvefurinn færði okkur myndir af líkkistum bandarískra hermanna. Hann færði okkur myndir frá Abu Ghraib. Fólk er farið að sjá sannleikann framhjá hefðbundnum fjölmiðlum. SARS og AIDS í Kína fréttust á vefnum. Estrada var felldur af vefnum.

Fólk bíður ekki lengur eftir skömmtun frétta hjá fjölmiðlum. Það sættir sig ekki við, að risafyrirtæki ráði þjóðfélaginu. Það endurheimtir vald sitt með hjálp veraldarvefsins. Tvær milljónir borgara munu hver greiða $100 og fella auðvaldið.

Sjá nánar: Joe Trippi, The Revolution Will Not Be Televised, 2004

Fair Use © Jónas Kristjánsson, 2008

Hlé