Ég hugsaði mér, að næst fengi ég mér púrrusúpu Hinriks VIII, olífukæfu og spaghetti Bolognaise. En þá var kominn nýr matseðill. Þetta var horfið og nýtt komið í staðinn, ekki síður spennandi.
Þannig er Krákan, full af hugmyndaflugi og breytingagirni, einn af sárafáum nýju staðanna, sem á eitthvert erindi við okkur. Ég hlakka jafnvel til að fara þangað, næstum eins og ég hlakka til að fara í Arnarhól og ef til vill tvo aðra staði.
Þar með er ekki sagt, að Krákan búi yfir sérlega fínlegri matreiðslu. Þegar réttirnir eru komnir á borð, eru þeir ekki alltaf eins spennandi og þeir litu út fyrir að vera á matseðlinum. Þar á ofan eru þeir stundum allt aðrir en þeir, sem ég átti von á að fá eftir að hafa lesið nöfn þeirra á seðli.
Krákan er mun smekklegri og notalegri veitingastaður en fyrirrennarar hennar voru hér á horni Laugavegar og Klapparstígs. Mikið af ruslinu hefur verið rifið út, en Búdda situr þó eftir og er kominn upp á gamlan og ólitaðan viðarskenk við langvegg. Smávægilegt er komið af undarlegu dóti, svo sem stytta af þjóni og grænmetissultur í krukkum á hillu.
Mikið er af pottablómum, einkum í gluggum. Sperrur eru í svörtu lofti og viður í hvítum þiljum. Málverkasýningar hanga á veggjum. Sæti eru fyrir 32 á neðra gólfi og 13 á hinu efra. Sveigður viður er í stólbökum og tágar í setum. Á borðum eru bleikir og hóflega hreinir dúkar undir diskamottum, pappírsmunnþurrkum og skemmtilegum kertastjökum úr hörpuskeljum.
Í heild má kalla umhverfið viðkunnanlegt fremur en ríkmannlegt. Vaskurinn á salerni var undarlega óhreinn.
Matseðill fyrir Marzbúa
Matseðill Krákunnar er engu líkur, sem ég hef séð. Það er eins og hann sé gerður fyrir aðvífandi Marzbúa, eins konar sýnishorn matargerðar jarðarbúa. Hann spannar Grikkland, Indland, Texas, Mexikó, Kína, Jamaíka, Indónesíu, Ítalíu, Portúgal, Rússland og jafnvel Ísland. Annan eins hrærigraut hef ég aldrei séð á matseðli og er þó ýmsu vanur.
Fulltrúi Grikklands var ágætis pönnubrauð, þykkt og seigt, með tveimur ídýfum, sem gáfu réttinum nafnið Sadziki og Taramosalata. Sadziki á að vera söxuð gúrka, hvítlaukur og dill eða minta í olífuolíu og jógúrt og ef til vill ediki. Taramosalata á að vera kæfa hrogna, til dæmis þorskhrogna, og olífuolíu, sítrónu og brauðmylsnu. Í raun voru þetta mildar og hlutlausar ídýfur aðallega úr jógúrt. Smávegis gulrótarbragð var að hrognakæfunni, en hins vegar ekkert hrognabragð. Kannski hefur kokkurinn farið línuvillt í matreiðslubókinni.
Kryddlegin og glóðuð svínarif voru kölluð “Mao Tse Tung”, sennilega til að vara fólk við. En það er ástæðulaust, því að þetta reyndist vera ágætis forréttur, bragðsterkur og skemmtilegur.
Fyrirferð á grænmeti
Grænmetisréttirnir eru blessunarlega fyrirferðarmiklir á seðlinum. Einn þeirra er hin mexíkanska Tortilla, stökk, opin pönnukaka utan um fyllingu bauna og grænmetis. Hún var góð, en ekki bragðsterk. Henni fylgdi ágæt, sæt jógúrt-ídýfa og hrásalat.
Annar grænmetisréttur er hin indverska Samósa, djúpsteiktar pönnukökur, vafðar utan um blöndu af baunum og öðru grænmeti, einkum papriku og gulrótum. Á matseðlinum er því raunar haldið fram, að réttur þessi sé frá Líbýu. Pönnukökurnar voru þunnar og stökkar, bragðgóðar og snarpheitar. Þetta reyndist vera ekta Austurlandaréttur. Áðurnefnd jógúrtsósa fylgdi.
Hrásalatið, sem fylgdi grænmetisréttunum og aðalréttunum, var frambærilegt, aðallega hvítkál eða kínakál með mjög litlu af jógúrt eða sýrðum rjóma.
Graslauksúpa var sæmileg og karrísúpa var góð, með miklu af sveppum, papriku og dósa-ananas, fremur sæt.
Pönnukaka með Chilli con carne var þunn, íslenzk pönnukaka, lögð utan um hakkað kjöt og baunir, bragðsterkari, betri og matarmeiri réttur en sá, sem ég hafði áður fengið í Sombrero.
Djúpsteiktur fiskur var góður, enda ekki of mikið eldaður. Skorpan var þunn og stökk. Með fylgdi sætsúr sósa.
Kryddlegnar úthafsrækjur voru misheppnaðar, einkum vegna þess að þær voru fastar í skelinni og vildu ekki losna með neinum hefðbundnum aðferðum. Þær voru skemmtilega, en raunar of mikið kryddaðar, alveg eins og verið væri að fela rækjubragðið. Brennt smjör fylgdi þeim.
Hörpuskelfiskur Jamaica var alveg meyr og góður, ekki ofeldaður. Hann var borinn fram með ferskum sveppum og papriku í mikilli og blessunarlega hveitilausri sósu.
Kryddleginn lambavöðvi var fulltrúi Íslands á seðlinum. Hann var vel leginn, meyr, ekki ofeldaður. Þessum ágæta rétti fylgdi lint og ólystugt brokkál og bökuð kartafla, svo og tvær skemmtilegar sósur, önnur með piparrót og hin með mintu.
Rauður kjúklingur
Kjúklingur tandoori var sæmilega verðugur fulltrúi Indlands, kallaður “skræpótti fuglinn”. Slíkur kjúklingur er leginn í jógúrt og kryddblöndu, sem gerir hann eldrauðan að utan, þegar hann er bakaður í ofni, sem helzt á að vera leirofn, sem Indverjar kalla Tandoor. Rauða húðin var góð, en kjötið var of þurrt. Því fylgdi skemmtilega sterk sósa og næfurþunnt, stökkt brauð, afar skemmtilegt, svo og lime og laukhringir og auðvitað hrísgrjón.
Lítið er um eftirrétti í Krákunni. Enginn var skráður á fastaseðlinum, sem ég sá, og aðeins í einni heimsókn var einn eftirréttur skráður á seðli dagsins, eldsteikt epli með rjóma. Ég prófaði þau ekki, en hins vegar ágætt kaffi úr nýrri espresso-vél.
Þjónusta er alúðleg í Krákunni. Vínlistinn er fremur lélegur, eins og raunar víðast hér á landi. Niðursoðin tónlist er í bakgrunni. Gestakokkar hafa stundum sett svip sinn á staðinn. Svo brá mér um daginn, þegar boðaður var ljóðalestur í náinni framtíð. Það lá við, að ég missti matarlyst.
Verðlag Krákunnar er hóflegt, mitt á milli miðjuverðstaða á borð við Torfuna og staða lágs verðs á borð við Pottinn og pönnuna. Samkvæmt reikningsaðferðum þessa greinaflokks ætti þriggja rétta máltíð með hálfri flösku af víni og kaffi að kosta 995 krónur.
Af einkunnagjöfinni hér á síðunni má sjá, að töluvert samræmi er milli verðs og gæða, betra samræmi en áður hefur fundizt í greinaflokknum. Þess vegna á Krákan erindi til okkar.
Jónas Kristjánsson
Hádegisseðill:
140 Gúllassúpa
210 Frönsk eggjakaka
280 Fiskigúllas Napólí
335 Pönnukaka chilli con carne
230 Somósa
Kvöldseðill
120 Grænmetissúpa
280 Djúpsteiktur fiskur Hawai
325 Spaghetti Bolognaise
210 Skinkurúllur með salati og piparrótarsósu
230 Tortilla Mexikana
240 Fyllt paprika Milano
350 Gratineraðir sjávarréttir
Fastaseðill
240 Sjávarréttasúpa
205 Karrísúpa
120 Sadziki og Taramosalata
185 Svínarif Mao Tse Tung
165 Djúpsteiktir paprikuhringir með chilli-hnetusósu
210 Kræklingar vinaigrette
245 Salatskál með rækjum og túnfiski
230 Grillsteikt lambalifur með marineruðum sveppum
260 Síldarópera með rúgbrauði, karrí og tómat
220 Eggjakaka
215 Barnaborgari með kartöflum og salati
225 Pilau kryddhrísgrjón með salati
230 Somósa heimalagað brauð með grænmetisfyllingu
175 Árstíðarsalat með hvítlauksdressing
260 Tortilla grænmetisætunnar
345 Smokkfiskur Chinatown
330 Maschchi kebab marineraðir sjávarréttir á teini
365 Hörpuskelfiskur Jamaica
380 Djúpsteiktur skötuselur Indónesía
635 Lamb Islandia, marineraður lambavöðvi
445 Skræpótti fuglinn, tandoori kjúklingur
305 Chilliborgari Mexikana
720 T-bone steik Texas
335 Pönnukaka vestursins, chilli con carne
50 Kaffi
DV
