Bixinu við göngukafla Laugavegs hefur farið fram, síðan það varð að Greifanum frá Monte Christo. Samt hefur verðlagið haldizt óbreytt, enda var það of hátt fyrir. Bezti kostur staðarins er, að þangað er hægt að skjótast í súpu með brauði og salatborð með eftirréttum fyrir 290 krónur, ekki aðeins í hádeginu, heldur einnig á kvöldin.
Útlit staðarins hefur lítið breytzt. Hann er orðinn notalegri, án þess að ég geti fest hendur á orsökunum. Andrúmsloftið er fremur suðrænt. Veggir eru ljósir og þar hanga eldhúsáhöld, aðallega koparpönnur, svo og körfur, þurrkaðar jurtir og hvítlaukur. Myndir af viðskiptavinum veitingahúsa eru blásnar í gler meðfram inngangi og í glugganum út að götu.
Viðskipti í síma
Fremur rúmt er um gesti í 44 gylltum stálstólum með tágasetum við bleikdúkuð borð, þar sem logar á kertum og munnþurrkur eru úr pappír. Í lofti eru vængjaviftur og á gólfi teppi. Innst er snyrtilegur bar eða skenkur og þar til hliðar setukrókur. Á miðju gólfi er svo salatborðið. Að tjaldabaki er niðursoðin tónlist, fremur hávær.
Yfir borðum hanga tágakrónur, nema fornfáleg ljósakróna yfir setukróknum. Þar sátu gjarna vinir hússins og stunduðu viðskipti gegnum síma. Ekki fer eins illa á því í Greifanum og í Sombrero, því að þar gerðist það í miðjum sal, en hér úti í horni.
Þetta er frekar afslappaður eða slakaður staður. Gestum finnst jafnvel, að þeir fengju að sitja í setukróknum og stunda viðskipti í síma, ef þar væri rúm fyrir fleiri. Þjónusta er ágæt, færir gestum stundum óumbeðið ísvatn á borð og man stundum, hver pantaði hvað. Og fumlaus er hún sem skóluð væri.
Greifinn er einn þeirra staða, sem fer illa að vera tómur og vel að vera fullur af gestum. Mannmergð samsvarar suðrænu útliti staðarins. Þá vantar eiginlega ekkert nema Miðjarðarhafseldhús til að fá dæmið til að ganga upp. En því er ekki til að dreifa. Eldamennskan er afar lítið spennandi.
Gersamlega hugmyndasnauður
Fastaseðillinn er gersamlega hugmyndasnauður, hinn dæmigerði matseðill íslenzkra veitingahúsa. Hann skiptist að jöfnu milli fisk- og kjötrétta. Auk forrétta, aðalrétta og eftirrétta er boðið upp á ýmsa smárétti og barnarétti. Ennfremur tvenns konar fondue, bæði kjöts og osta. Skemmtilegasti titillinn á seðlinum er “Steik Gordon Blue”, sem líklega á að tákna Cordon Bleu nautasteik.
Vínlistinn sýnir örlítið meiri tilþrif en almennt gerist, býður í rauðvínum upp á Chateau Cantenac-Brown og Santa Christina og í hvítvínum Riesling Hugel, Bernkasteler Schlossberg og Hochheimer Daubhaus. Þótt við bætist Tio Pepe er þetta samt lítið í samanburði við það, sem hægt væri að hafa, svo sem ég hef rakið á öðrum stað.
Í hádeginu var boðið upp á tvo rétti dagsins, að súpu og salatborði inniföldu. Súpan var rjómalöguð rósakálsúpa sæmileg. Pönnusteikt rauðspretta var ágæt, mildilega elduð, borin fram með óþörfum dósakræklingi, hvítum kartöflum og smjöri, sem blessunarlega var haft í sérstakri skál til hliðar.
Á salatborðinu voru tvenns konar flautur, heilhveiti- og ostabrauð. Ennfremur fimmtán skálar með tvenns konar sósu, þreytulegum sveppum, möskuðum eggjum, tómati, gúrku og sýrðri gúrku, papriku, maís, blaðlauk og kotasælu, svo og blönduðu hrásalati. Ennfremur voru þar appelsínubátar, melónubitar og vínber, sem kjörið var að nota til eftirréttar.
Þetta salatborð er svo sem ekki fallegra eða betra en gengur og gerist á stöðum, sem bjóða slíkt, og er alls ekki í fremsta flokki. Eigi að síður er það alfa og ómega staðarins. Ekki má heldur gleyma, að það er hið eina slíka í gamla miðbænum. Ég man að minnsta kosti ekki eftir öðru.
Rækjukokkteill var góður, borinn fram með mildri hvítvínssósu, sítrónu og ristuðu brauði með smjöri í álpappír. Eggjakaka með sveppum var fremur þurr. Humarsúpa var vel rjómuð og með miklu af þeyttum rjóma ofan á, en humarbitarnir voru of þurrir.
Staðlað meðlæti
Kræklingur var borinn fram heitur undir gífurlegu magni af sósu með skán og með ristuðu brauði brenndu. Meðlætið var hinn sami garnitúr, sem fylgdi öllum forréttum og aðalréttum staðarins, tómatsneið, tvær gúrkusneiðar, sítrónusneið og salatblað. Kræklingurinn er betri upp úr dósinni en gratineraður á þennan hátt.
Pönnusteiktur skötuselur var ágætur, vel kryddaður, borinn fram með rækjublönduðum hrísgrjónum og mjög sterkri karrísósu. Gufusoðin smálúða var stórum lakari, afar þurr, borin fram upprúlluð í fylgd með hvítvínssósu og kartöflum. Hún var prófuð tvisvar og reyndist ofelduð í bæði skiptin.
Lambasteik Monte Christo var næstum hæfilega snöggt elduð og sæmilega meyr. Henni fylgdu miðlungi soðnar gulrætur og rósakál, svo og bökuð kartafla og frambærileg béarnaise-sósa. Enn betri var piparsteik, hæfilega hrásteikt, en henni var spillt með afar sterkri og ekki góðri piparsósu og gassalega elduðu brokkáli og sveppum.
Kaffi var sæmilegt, þótt í þynnra lagi væri, borið fram með áfengu konfekti og innifalið í verðinu.
Súpa, salat og eftirréttur kosta 290 krónur, sem fyrr segir. Miðjuverð rétta dagsins í hádeginu er 390 krónur, að súpu, salati og eftirrétti inniföldu. Á fastaseðli er miðjuverð þriggja rétta máltíðar með kaffi og hálfri flösku af víni á mann 1258 krónur. Það er dæmigert meðalverð íslenzkra veitingahúsa.
Jónas Kristjánsson
Hádegismatseðill:
Rjómalöguð rósakálsúpa
425 Nautasmásteik með rauðvínssósu
355 Pönnusteikt rauðspretta með kræklingi
(Súpa og salatbar fylgir)
290 Súpa og salatbar
Fastaseðill:
190 Rjómalöguð humarsúpa
275 Rækjukokkteill með hvítvínssósu og ristuðu brauði
160 Frönsk lauksúpa
250 Gratineraðir kræklingar í hvítvínssósu
320 Hvítlauksristaðir sniglar með hvítlauksbrauði
395 Pönnusteikt ýsa með rækjum og kræklingi
410 Gufusoðin smálúða með hvítvínssósu
465 Pönnusteiktur skötuselur með hrísgrjónum og karrísósu
495 Gratineraðir sjávarréttir með ristuðu brauði
410 Síldarbakki með rúgbrauði og hvítum kartöflum
890 Hvítlauksristaður humar
685 Pönnusteiktar grísakótilettur með gráðostsósu
595 Steik Gordon Blue með smjörsteiktum kartöflum
620 Lambasteik Monte Christo með béarnaise-sósu
690 Enskt buff með lauk og hvítum kartöflum
790 Piparsteik að hætti greifans með bakaðri kartöflu
210 Súkkulaðihjúpaður ananas með rjóma
180 Vanilluís með rjóma, súkkulaðisósu og ískexi
250 Blandaðir ávextir með Grand Marnier og rjóma
295 Djúpsteiktur camembert með rifsberjasósu
275 Kavíar með lauk og eggjarauðu
720 Buff tartar með eggjarauðu, lauk og kapers
320 Djúpsteiktar rækjur með ristuðu brauði
290 Eggjakaka með rækjum og spergli eða skinku og sveppum
950 Kjötfondue (minnst fyrir tvo)
550 Ostafondue
200 Hamborgari eða samloka eða grillaðar pylsur með frönskum
DV
