Tillaga að viðbót við siðareglur Blaðamannafélags Íslands:
1. GREIN. Blaðamaður skal virða einkunnarorð siðareglna félagsins: “Oft má satt kyrrt liggja.” Hann skal jafnan gæta þess að birta ekkert, sem neinn í þjóðfélaginu geti verið andvígur. Sérstaklega skal hann taka tillit til auglýsenda og blaðurfulltrúa og birta tölvupóst þeirra orðréttan.
2. GREIN. Ekki skal fjallað um framhjáhald og lausagang frægðarfólks, nema það séu útlendingar, sem ekki skilja íslenzku. Í þeim tilvikum skal efnið jafnan birt á þann hátt, sem tíðkazt hefur í Morgunblaðinu undanfarin ár. Almennt skulu blaðamenn hafa Morgunblaðið að fyrirmynd.
3. GREIN. Ekki skal fjallað um hneykslislíf, nema það hafi í minnst viku verið til umræðu á spjallrásum og vefsíðum á netinu og farið þar minnst tvöfalt fram úr staðreyndum. Skal blaðamaðurinn þá jafnan hneykslast á spjallrásunum og efni málsins aðeins birt sem útskýring á hneykslun hans.
4. GREIN. Refsing við minni háttar brotum á siðareglum þessum felst í, að starfsfólk Talstöðvarinnar sendi viðkomandi fjölmiðli mótmælaskjal. Refsing við meiri háttar brotum felst í, að fjölmiðlinum er skylt að ráða þann, sem minnst kann í faginu, af þeim, sem undirrituðu mótmælin.
5. GREIN. Ákvarðanir um refsingar við brotum á siðareglum skulu teknar af prófessor í fjölmiðlafræðum, sem aldrei hefur unnið á ritstjórn. Skulu þær byggjast á meginreglunni, að tilgangur fjölmiðla sé að vera hluti af kerfinu og axla þá samfélagslegu ábyrgð, sem fylgir kerfinu og dýrð þess.
DV
