Hestar geta ekki hannað atburðarás. Þegar Prins veltir sér á hina hliðina, lendir hann með fæturna í girðingu, af því að hann gerir sér ekki grein fyrir flatarmálsþörf veltunnar. Hann verður hræddur og hissa, en endurtekur mistökin. Pólitíkusar hanna hins vegar atburðarásir, þar á meðal Halldór Ásgrímsson. Að vísu fór fyrir honum eins og Prinsi, að atburðarásin gekk ekki upp. Það reyndist hægara sagt en gert að arfleiða Finn Ingólfsson að flokksríkinu. Ég man líka eftir manni, sem fótbrotnaði, því að hann gerði sér ekki grein fyrir flatarmálsþörf hestveltu. Hann varð fyrir hestinum.
