Ég er orðinn svo fullorðinn, að ég er að mestu hættur að vinna eða lesa á kvöldin. Mér getur dottið í hug að taka hausinn úr sambandi með því að horfa á sjónvarp. Heima hjá mér eru svo margar rásir, að heila eilífð tekur að skruna milli þeirra. En þar er hvergi bita að sjá. Ég er búinn að fá upp í kok af múmíu- og píramídaþáttum og ferðaþættirnir eru bara hefðbundin sjálfhverfa þáttastjóra. Ég skruna tvær umferðir í klukkutíma og fer svo bara að sofa. Ömurlegast er þó fréttasjónvarpið, frá CNN yfir í Fox, sem notað er til að misþyrma einmana ferðamönnum á hótelherbergjum.
